प्रमुख प्रतिपक्षी दल एमालेका अध्यक्ष केपी ओलीले पालिका चुनावमा सत्ताको बलमा गठबन्धनले बुथ क्याप्चर गरेको आरोप लगाएका छन्।

प्रतिनिधिसभामा बिहीबार सरकारको नीति तथा कार्यक्रममाथि छलफलमा भाग लिँदै ओलीले त्यस्तो आरोप लगाएका हुन्।

चुनाव सकिएको १४ दिनसम्म पनि मत परिणाम आउन नसक्नु नै निर्वाचन स्वच्छ र धाँधलीरहित हुन नसक्नुको प्रमाण रहेको उनको दाबी थियो। उनले भने, ‘सत्ता पक्षले बुथ कब्जा गरेको ठाउँमा प्रहरी निरीह भएर बसेको छ।’

चुनावअघि, मतदान र मतगणनाका बेला पनि एमाले नेता–कार्यकर्तामाथि सत्ता पक्षले आक्रमण गरेको उनले तर्क गरे। रुकुम, ताप्लेजुङ र हुम्लामा मतदाताको हत्या भएको बताउँदै उनले एमालेका प्रतिनिधिलाई छेक्ने, कुट्ने, घेर्ने काम भएको आरोप लगाए। र, कुनै पनि ठाउँमा आफ्नो पार्टीका कारण मतदान प्रभावित नभएको दाबी गरे।

सत्ता गठबन्धनले घोषित रूपमै एमालेलाई धुलो चटाउने र पत्तासाप गर्ने नीति लिएको आरोप पनि लगाए। ‘एमालेलाई सिध्याइदिने नीति लिएर गरिएको चुनाव हो। नेताहरूले भाषण नै गर्नुभएको छ। जसरी पनि जित्नुपर्छ भनेर त गीतै बनाएर गाउनु नै भएको छ,’ उनले भने।