हालै गहुँ र चिनीको निर्यात घटाउने आफ्नो सरकारको निर्णयको भारतका केन्द्रीय मन्त्री पीयूष गोयलले बचाउ गरेका छन्।
भारत कहिल्यै कृषि उपजको निर्यातक मुलुक नरहेको उनको दाबी छ। केन्द्रीय वाणिज्य तथा उद्योग मन्त्री गोयलले स्विजरल्यान्डको डाभोसमा जारी एक अन्तर्राष्ट्रिय सम्मेलनमा सरकारको नीतिको बचाउ गरेका हुन्।
घरेलु मागलाई दृष्टिगत गर्दै त्यस्तो निर्णय लिनु परेको गोयलको भनाइ छ। वर्ल्ड इकोनोमिक फोरमको वार्षिक बैठकलाई सम्बोधन गर्दै गोयलले भारत हरित क्रान्ति शुरु हुनु अघिसम्म कृषि उपजको आयात गर्ने गरेको उल्लेख गरे। र, कहिल्यै अन्न निर्यातको मुख्य मुलुक नभएको बताए।
‘बितेका धेरै वर्ष हामी घरेलु उपभोगका लागि मात्र उत्पादन गरिरहेका छौँ। पछिल्ला दुई वर्ष मात्र हामीले अतिरिक्त कृषि उपज निर्यात गर्यौँ। त्यो पनि सानो परिमाणमा सीमित छ,’ उनले भने, ‘भारतमा उत्पादित गहुँ गरिब देशहरूमा मात्र निर्यात हुन्छ। पछिल्ला वर्षमा जलवायु परिवर्तनका कारण गहुँको उत्पादन ह्वात्तै घट्यो। र, केन्द्रीय खाद्य सुरक्षा भण्डारबाट गहुँ निकाल्नुपर्यो।’
अझै पनि विश्व व्यापार संगठनले इजाजत दिएमा भारतले गरिब मुलुकका लागि कृषि उपज निर्यात गर्ने उनले बताए।
