भरतपुर महानगरमा गठबन्धनबाट माओवादी केन्द्रकी उम्मेदवार रेनु दाहाल मेयरमा विजय घोषणा हुन मात्र बाँकी छ।
किनकि, गणना गर्न बाँकी मत आठ हजार ५८६ मात्र बाँकी छँदा रेनु दाहालको अग्रता ११ हजार ७४० मतको अन्तरमा छ।
एक लाख १९ हजार २५३ मत गणना भइसकेको छ। मंगलबार बिहानसम्ममा उनको जित घोषणा हुने सम्भावना बढेको छ।
हालसम्म प्राप्त परिणामअनुसार रेनु ४८ हजार ३०५ मत प्राप्त गरेकी छन्। उनको निकटतम प्रत्यासी एमालेका विजय सुवेदीले ३६ हजार ५६५ मत पाएका छन्। तेस्रो स्थानमा गठबन्धनविरुद्ध बागी उम्मेदवारी दिएका पूर्वकांग्रेस नेता जगन्नाथ पौडेलले १४ हजार ५४२ मत प्राप्त गरेका छन्।
उपमेयरमा पनि कांग्रेसका चित्रसेन अधिकारी विजय भएको घोषणा मात्र बाँकी छ। अधिकारीले ४९ हजार २१४ र उनकी प्रतिस्पर्धी राप्रपाकी हिमला गुरुङले २८ हजार ६०४ मत पाएका छन्। अहिले २६, २७ र २८ नम्बर वडाको मत गणना भइरहेको छ।