काठमाडौँ । गत वैशाख ३० गते सम्पन्न स्थानीय तह निर्वाचनको मत परिणाम आउने क्रममा जारी छ । धेरैजसो जिल्लाको अन्तिम मत परिणाम सार्वजनिक भइसकेको छ ।
जसमा नेकपा माओवादी केन्द्रको आधार इलाका मानिने रुकुम पश्चिमको सबै पालिकाका परिणाम सार्वजनिक भइसकेको छ । अर्थमन्त्री जनार्दन शर्माको गृह जिल्लासमेत रहेको रुकुम पश्चिममा नेकपा एमालेले कुनै पालिकामा जित निकाल्न सकेन ।
कूल ६ वटा पालिका रहेको यस जिल्लामा चार वटामा माओवादी केन्द्रले जित हात पार्दा दुई वटा पालिकामा नेपाली कांग्रेस विजयी भएको छ । तर, विं.सं. २०७४ सालको स्थानीय निर्वाचनमा यस जिल्लाको सबै पालिकामा माओवादी केन्द्रमा उम्मेदवार विजयी भएका थिए ।
यसपटकको निर्वाचनमा सत्ता गठबन्धनभित्रकै दलहरू कांग्रेस र माओवादी केन्द्र रुकुम पश्चिममा प्रतिस्पर्धी देखिए । जसमा माओवादीले चार पालिकामा जित्दै पहिलो पार्टी बन्न सफल भए । तर, दुई पालिकाको नेतृत्व गुमाउन पुगे ।
यसपटकको निर्वाचनमा कांग्रेसले माओवादीबाट मुसिकोट नगरपालिका र बाँफिकोट गाउँपालिकाको प्रमुख खोस्न सफल भयो । यस क्रममा कांग्रेसले एमालेको साथ लिए ।
गठबन्धन दलको शीर्ष नेताहरूको सहमतिविपरीत जिल्ला तहका कांग्रेस–एमालेका नेताहरू एक हुँदा माओवादी पराजित बन्न पुगे । अर्थात एमालेको काँधमा चढेर कांग्रेसले रुकुम पश्चिमबाट माअोवादीसँग दुई पालिका प्रमुख जित्न सफल भएको छ ।
मुसिकोटको प्रमुखमा कांग्रेसका महेन्द्र केसी विजयी हुँदा माओवादी केन्द्रका बसन्तकुमार शर्मा जम्मा १३ मतले पराजित बन्न पुगे ।
यहाँ कांग्रेस–एमाले एक हुँदा माओवादी–समाजवादीको गठबन्धन भएको थियो । यस्तै, यस पालिकामा पहिलोपटक ६ वडा वडामा समेत कांग्रेसका उम्मेदवार विजयी हुन पुगे ।
यस्तै, बाँफिकोट गाउँपालिकामा पनि कांग्रेस विजयी हुँदा माओवादी पराजित बन्न पुग्यो । कांग्रेसका जनककुमार बाँठा पालिका अध्यक्षमा विजयी हुँदा माओवादीका चन्द्रबहादुर केसी जम्मा ३१ मतान्तरले पराजित भए ।
यस्तै, उपाध्यक्षमा भने माओवादी केन्द्रकै उम्मेदवार विजयी भए । माओवादीकी तारा बुढा केसीले कांग्रेसकी नन्दाकुमारी नाथलाई पराजित गरेकी हुन् । यस पालिकामा पनि कांग्रेस–एमालेले माओवादीका विरुद्ध गठबन्धन गरेको थियो ।
२०७४ सालको स्थानीय तह निर्वाचनमा यस पालिकाको सबै तहमा माओवादी केन्द्रका उम्मेदवार विजयी भएका थिए ।
