काठमाडौं- आज ३ अगस्ट। विश्व इतिहासका असंख्य घटनाले आजको दिन संसारभर स्मरण गराउँछन्। प्रस्तुत छ, इतिहासमा आज भएका केही विश्व चर्चित घटनाको सारसंक्षेप।
– सन् १९६०- नाइजर फ्रान्सबाट स्वतन्त्र
पश्चिम अफ्रिकी मुलुक नाइजर आजकै दिन फ्रान्सको अधीनबाट स्वतन्त्र भएको थियो। उक्त मुलुक २०औं शताब्दीमा फ्रान्सको उपनिवेश बनेको थियो। स्वतन्त्रता प्राप्तिपछि हमानी डियोरी त्यहाँको पहिलो राष्ट्रपति बनेका थिए।
– सन् १९८१- अमेरिकाका १३ हजार एटीसी एकसाथ हडतालमा
सन् १९८१ मा आजकै दिन अमेरिकाका १३ हजार एयर ट्राफिक कन्ट्रोलरहरू एकसाथ हडतालमा उत्रिएका थिए। उनीहरूलाई काममा फर्काउन तत्कालीन राष्ट्रपति रोनाल्ड रेगनले जागिर खाइदिने धम्की दिनुपरेको थियो। उनले भनेका थिए, ‘यदि ४८ घण्टाभित्र काममा फर्किएको अभिलेख नदेखिएमा उनीहरूको जागिर जफत गरिने छ र कामबाट निकालिने छ।’
– सन् २००५- मौरिटानियामा सैन्य ‘कु’
सन् २००५ मा आजकै दिन उत्तर-पश्चिमी अफ्रिकी मुलुक मौरिटानियामा सैन्य ‘कु’ भएको थियो। त्यहाँको सेनाले लामो समयदेखि राष्ट्रपति रहेका माओयुया ओउल्ड सिदअहमद तायालाई सत्याच्युत गरेको थियो। कर्णेल इली ओउल्ड मोहमेद भालले सोही वर्ष सम्पन्न निर्वाचनसम्म संक्रमणकालीन सरकारको नेतृत्व गरेका थिए।
– सन् २०१९- अमेरिकामा आतंकवादी आक्रमण
सन् २०१९ मा आजकै दिन अमेरिकाको टेक्सासमा अमेरिकाकै आतंकवादी समूहले आक्रमण गरेको थियो। टेक्सासको एल पासोस्थित वालमार्ट स्टोरमा भएको उक्त आक्रमणमा २२ जनाको ज्यान गएको थियो भने २४ जना घाइते भएका थिए।
– सन् २०२२- काठको सर्वाधिक अग्लो भवन
सन् २०२२ मा आजकै दिन अमेरिकाको विस्कन्सिन राज्यको मिल्वौकीमा काठको हालसम्मकै अग्लो भवन निर्माण पूरा भएको थियो। २५ तलाको उक्त भवन ८६.६ मिटर अग्लो छ।
– सन् २०२२- मेक्सिकोमा चर्को खडेरी, दैनिक ९० लाख लिटर पानी वितरण
सन् २०२२ मा उत्तर अमेरिकी मुलुक मेक्सिकोमा चर्को खडेरी परेको थियो। मेक्सिकोको ४८ प्रतिशत भूभाग खडेरीको मारमा परेको थियो। खासगरी, खडेरीबाट सर्वाधिक प्रभावित मोन्टेरीका ४०० वटा ठाउँमा दैनिक ९० लाख लिटर पानी वितरण गर्नुपरेको थियो।
– सन् २०२३- डुंगा डुब्दा ३७ आप्रवासी मारिए
सन् २०२३ मा आजकै दिन इटालीको ल्याम्पेडुसा द्विप नजिक समुद्रमा डुंगा डुब्दा ३७ जना आप्रवासीको ज्यान गएको थियो। डुंगामा ४१ जना सवार थिए, तीमध्ये ४ जनालाई जीवितै उद्दार गरिएको थियो। उक्त डुंगामा आइभरी कोस्ट र गिनीका आप्रवासी सवार थिए।
– सन् २०२५- सिड्नीमा ३ लाख प्रदर्शनकारी !
सन् २०२५ मा आजकै दिन अस्ट्रेलियाको सिड्नीमा भेला भएका ३ लाख प्रदर्शनकारीले प्यालेस्टिनको पक्षमा संसारको ध्यानाकर्षण गराएका थिए। सिड्नी हार्बर ब्रिजमा भेला भएर उनीहरूले गाजामा तत्काल युद्धविराम गर्न आह्वान गरेका थिए। यो सिड्नीको इतिहासकै ठूलो प्रदर्शन थियो।
– सन् २०२५- रुसमा फुट्यो ज्वालामुखी
सन् २०२५ मा आजकै दिन रुसको कामाचट्का पेनिन्सुलामा ज्वालामुखी विष्फोट भएको थियो। क्रासेनिनिकोभ नाम दिइएको उक्त ज्वालामुखी ६ सय वर्षपछि पहिलोपटक विष्फोट भएको थियो। ज्वालामुखीका कारण त्यस क्षेत्रमा ८.८ रेक्टर स्केलको भूकम्प गएको थियो।