काठमाडौं- आज ३१ जुलाई। विश्व इतिहासका असंख्य घटनाले आजको दिन संसारभर स्मरण गराउँछन्। प्रस्तुत छ, आजको दिन भएका केही विश्व चर्चित घटनाको सारसंक्षेप।
– सन् १९९१- अमेरिका र सोभियत संघबीच हतियार न्यूनीकरण सन्धि
सन् १९९१ मा आजकै दिन अमेरिका र तत्कालीन सोभियत संघबीच हतियार न्यूनीकरणसम्बन्धी सन्धि भएको थियो। ‘स्टार्ट-१’ नाम दिइएको उक्त सन्धिले परमाणु हतियार र क्षेप्यास्त्रहरूको संख्या सीमित गरेको थियो। सन् १९९४ मा लागू भएको उक्त सन्धि २००९ मा समाप्त भएको थियो।
– सन् १९९२- नेपालमा थाई विमान दुर्घटनामा ११३ मारिए
सन् १९९२ मा आजकै दिन नेपालमा भएको थाई एयरवेजको विमान दुर्घटनामा त्यसमा सवार सबै ११३ जनाको मृत्यु भएको थियो। काठमाडौंस्थित त्रिभुवन अन्तर्राष्ट्रीय विमानस्थलमा अवतरणका लागि जाँदै गरेको एयरबस ३१०-३०४ विमान नुवाकोटको घ्याङफेदीमा दुर्घटनाग्रस्त भएको थियो।
– सन् १९९८- बारुदी सुरुङमाथि बेलायतको प्रतिबन्ध
सन् १९९८ मा आजकै दिन बेलायतले बारुदी सुरुङमाथि प्रतिबन्ध लगाएको थियो। जनस्तरबाट व्यापक दबाब आएपछि बेलायतको संसदले बारुदी सुरुङमाथि प्रतिबन्ध लगाउने कानून नै पारित गरेको थियो।
– सन् १९९९- अन्तरिक्ष यानलाई जानाजान चन्द्रमामा दुर्घटना गराइयो
सन् १९९९ मा आजकै दिन अमेरिकी अन्तरिक्ष अभियान नासाले जानाजान एक यानलाई चन्द्रमामा दुर्घटना गराएको थियो। डिस्कभरी कार्यक्रमअन्तर्गत पठाइएको लुनर प्रोस्पेक्टरलाई चन्द्र सतहमा जमेको पानी पत्ता लगाउने मिसन पूरा भएपछि त्यहीं दुर्घटना गराइएको थियो।
– सन् २०२३- पहिलो दास फोर्ट फेला
अफ्रिकाका मानिसहरूलाई दास बनाएर युरोप र अमेरिका पुर्याउन प्रयोग भएको पहिलो किल्ला आजकै दिन फेला परेको थियो। अफ्रिकी मुलुक घानामा बनाइएको उक्त किल्ला सन् १६३१ मा निर्माण गरिएको थियो। र, त्यसको नाम फोर्ट एम्स्टर्डम राखिएको थियो।
– सन् २०२४- ५ हजार वर्ष पुरानो कृषि बस्ती
अफ्रिकी मुलुक मोरक्कोमा सन् २०२४ मा आजकै दिन ५ हजार वर्ष पुरानो कृषि बस्ती फेला परेको थियो। मोरक्कोको ओएड बेहटमा फेला परेको उक्त बस्ती नवपाषाण युगको भएको पुरातत्त्वविदहरूले बताएका छन्।