कैलाली । राष्ट्रिय स्वतन्त्र पार्टी (रास्वपा) को सुदूरपश्चिम प्रदेश सभापतिमा प्रकाश बिष्ट निर्वाचित भएका छन्। बिष्ट हालका समेत सभापति हुन ।
सुदूरपश्चिम प्रदेश अधिवेशन अन्तर्गत भएको निर्वाचनमा खसेको ५१३ मतमध्ये बिष्टले ३५८ मत प्राप्त गर्दै विजयी भएका हुन्। उनका निकटतम प्रतिद्वन्द्वी जनक धामीले १५४ मत प्राप्त गरेका छन्।
निर्वाचन परिणामअनुसार बिष्टले उल्लेख्य मतान्तरसहित प्रदेश सभापतिको जिम्मेवारी प्राप्त गरेका हुन्। प्रदेश नेतृत्व चयनका लागि भएको निर्वाचनमा कार्यकर्ताको उत्साहजनक सहभागिता रहेको थियो।
अधिवेशन अन्तर्गत अन्य पदाधिकारी तथा सदस्य पदको मतगणना भने जारी रहेको निर्वाचन समितिले जनाएको छ। बाँकी पदहरूको अन्तिम परिणाम आउन बाँकी रहेको छ।
नवनिर्वाचित सभापति बिष्टले पार्टीलाई सुदूरपश्चिममा थप सशक्त बनाउँदै संगठन विस्तार, सुशासन र जनउत्तरदायी राजनीतिक अभ्यासलाई प्राथमिकतामा राखेर अघि बढ्ने प्रतिबद्धता व्यक्त गरेका छन्।
