कैलाली । सुदूरपश्चिम प्रदेश सरकारमा मन्त्रिमण्डल हेरफेरको तयारी तीव्र बनेको छ । नेकपा (एमाले) को भागमा परेका मन्त्रीहरूलाई फिर्ता बोलाएर नयाँ अनुहारलाई जिम्मेवारी दिने तयारी भएको स्रोतले जनाएको छ ।
स्रोतका अनुसार एमालेबाट सन्तोषकुमारी शर्मा थापा भौतिक पूर्वाधार विकास मन्त्री, दमन भण्डारी कृषि मन्त्री, चक्रबहादुर मल्ल आन्तरिक मामिला तथा कानुन मन्त्री तथा जानकी ऐर बम भौतिक पूर्वाधार राज्यमन्त्री बन्ने लगभग निश्चित भएको छ ।
हाल एमालेको तर्फबाट सुरेन्द्र पाल, वीरबहादुर थापा, हिरा सार्की र राज्यमन्त्री निर्मला साउद मन्त्रिपरिषद्मा रहेका छन् । उनीहरूलाई फिर्ता बोलाएर नयाँ टोली पठाउने तयारी भइरहेको बताइएको छ ।
एमालेभित्र मन्त्री चयनको विषयलाई लिएर पार्टीभित्र आन्तरिक शक्ति संघर्ष समेत देखिएको छ । मन्त्री छनोटमा पूर्वउपाध्यक्ष लेखराज भट्ट को प्रभाव बढेको भन्दै पार्टी महासचिव दामोदर भण्डारी निकट समूह असन्तुष्ट रहेको चर्चा राजनीतिक वृत्तमा चलिरहेको छ ।
यता सरकारको नेतृत्व गरिरहेको नेपाली कांग्रेसले भने आफ्ना मन्त्रीहरूको विषयमा अझै अन्तिम निर्णय गरिसकेको छैन । कांग्रेसभित्र समेत मन्त्री हेरफेरबारे छलफल जारी रहेको बताइएको छ ।
मन्त्रिमण्डल पुनर्गठनबारे औपचारिक निर्णय भने केही दिनभित्र सार्वजनिक हुने अपेक्षा गरिएको छ । राजनीतिक समीकरण र दलभित्रको शक्ति सन्तुलनका आधारमा अन्तिम टुंगो लाग्ने नेताहरूको भनाइ छ ।
