काठमाडौं- एमाले अध्यक्ष केपी ओलीले शुक्रबार सम्पन्न पालिका चुनावमा सत्ता गठबन्धनले हिंसा भड्काएको आरोप लगाएका छन्।
शुक्रबार साँझ विज्ञप्ति जारी गर्दै ओलीले केही स्थानमा एमालेविरुद्ध अग्रिम नक्कली मतपत्रसमेत छापी वितरण गर्ने, उत्तेजनापूर्ण गतिविधि गरी अनावश्यक रूपमा वातावरण बिथोल्ने र अनुचित ढंगले हिंसा भड्काउनेजस्ता कार्य गरेको आरोप लगाएका हुन्।
‘लोकतन्त्र र अग्रगमनको नाम जपी अलोकतान्त्रिक र प्रतिगामी अभ्यासमा लिप्त रहने पाँचदलीय सत्ता गठबन्धनबाट यसप्रकारको अधिनायकवादी कार्य भयो,’ उनले विज्ञप्तिमा भनेका छन्, ‘ती स्थानमा गृह प्रशासन अस्वाभाविक रूपमा असन्तुलित देखियो।’
ओलीले बाजुराको बुढीगंगा नगरपालिकामा निर्वाचन जारी रहेकै बेला रहस्यमय ढंगले सुरक्षाकर्मीलाई हटाई निर्वाचन बिथोल्न खोजिएको, केही पालिकाका प्रमुखका उम्मेदवारहरूलाई मतदान केन्द्र निरीक्षणमा बाधा पु¥याइएको दाबी पनि गरेका छन्। ‘यस प्रकृतिका घटना दर्जनौं स्थानमा भएका छन्। स्वतन्त्र निर्वाचनका विरुद्ध भएका यस्ता घटनाको विरोध गर्दै सरकारको पूर्वाग्रही र पक्षपाती व्यवहारप्रति म दुःख व्यक्त गर्छु,’ उनले भनेका छन्।
सत्ता गठबन्धनको निर्वाचन नै नगराउने षडयन्त्रलाई चिर्दै स्थानीय तहको निर्वाचन सम्पन्न भएको दाबी गर्दै उनले प्रतिकूलतालाई पन्छाउँदै लाखौं नयाँ मतदाता र ११३ वर्ष उमेरका पाका ज्येष्ठ नागरिकसम्मले हाम्रो आधारभूत तहको लोकतन्त्रलाई सुदृढ गर्न उत्साहका साथ मतदान गरेको बताएका छन्। ‘मतदानमा भाग लिनुहुने आम मतदाताहरूलाई धन्यवाद ज्ञापन गर्छु। मतदान गरेलगत्तै निधन भएका र मतदानको लागि जाँदै गर्दा सवारी दुर्घटनाबाट ज्यान गुमाएका मतदाताप्रति भावपूर्ण श्रद्धाञ्जलि र शोकाकूल परिवारजनमा गहिरो समवेदना व्यक्त गर्छु,’ ओलीको विज्ञप्तिमा भनिएको छ।
भयरहित वातावरणमा स्वच्छ निर्वाचनको लागि आफ्नो पार्टी, यसका नेता, कार्यकर्ता, सदस्य र समर्थकबाट लोकतान्त्रिक अधिकतम सकारात्मक भूमिका निर्वाह भएको दाबी पनि ओलीको छ। ‘तर सत्तापक्षीय गठबन्धनले केही स्थानमा हाम्राविरुद्ध अग्रिम नक्कली मतपत्रसमेत छापी वितरण गर्ने, उत्तेजनापूर्ण गतिविधि गरी अनावश्यक रूपमा वातावरण बिथोल्ने र अनुचित ढंगले हिंसा भड्काउनेजस्ता कार्यसमेत गर्यो,’ उनले भनेका छन्।
स्वच्छ निर्वाचनविपरीतका घटना भएका, मतदान केन्द्रको अनधिकृत कब्जा गरिएका र भय त्रास सिर्जना गरी मतदाताहरूलाई आतंकित पारिएका स्थानमा पुनः मतदानको माग गरी विभिन्न जिल्लाबाट उजुरीसमेत गरिएको उनले विज्ञप्तिमा बताएका छन्।