रुसी राष्ट्रपति भ्लादिमिर पुटिनले युक्रेनपछि फिनल्यान्डमाथि निशाना साँधेका छन्। नेटो सदस्य बन्ने फिनल्यान्डका नेताहरूबीच सहमतिपछि पुटिनले त्यसको परिणाम भोग्नुपर्ने चेतावनी दिएका छन्।
फिनल्यान्डका राष्ट्रपति र प्रधानमन्त्रीले बिहीबार मात्र नेटोमा सामेल हुन आवेदन दिने निर्णय गरेका छन्। र, फिनल्यान्डको छिमेकी मुलुक स्विडेन पनि नेटो सदस्य बन्ने तयारीमा छ।
नेटो सदस्य बन्न लागेकै कारण युक्रेनमाथि रुसले अढाइ महिनादेखि अत्याचारपूर्ण आक्रमण जारी राखेको छ। सोही कारण रुसका छिमेकी मुलुकहरूमा त्रासको वातावरण छ। सुरक्षा चिन्ताकै कारण रुसका छिमेकी मुलुकहरू धमाधम नेटो सदस्य बन्ने चक्करमा लागेका छन्।
आफ्ना छिमेकी मुलुक नेटोमा सामेल हुने विषय आउनासाथ रुसी राष्ट्रपति पुटिनको पारो तात्छ। अनि धम्कीपूर्ण प्रतिक्रिया दिने गर्छन्। नेटोमा सहभागी हुन लागेको फिनल्यान्डलाई पनि पुटिनले धम्की दिएका छन्।
रुसी विदेश मन्त्रालयले विज्ञप्तिमार्फत नेटोमा सहभागी भएमा द्विपक्षीय सम्बन्धलाई नोक्सानी पुग्ने चेतावनी फिनल्यान्डलाई दिएको छ। र, उत्तरी युरोपको सुरक्षा र स्थायित्वमाथि संकट आउने चेतावनी दिएको छ।
फिनल्यान्डका राष्ट्रपति साउली निनिस्टो र प्रधानमन्त्री सना मारिनले बिहीबार मुलुकलाई नेटो सदस्यता दिलाउन तत्काल आवेदन दिइने बताएका छन्। र, त्यसका लागि ढिलाइ गर्न नहुने उनीहरूको भनाइ छ। तथापि, संसदबाट त्यसबारे निर्णय हुन बाँकी छ।
फिनल्यान्ड र रुसबीच एक हजार ३०० किलोमिटर साझा सीमा छ। हालसम्म फिनल्यान्डले नेटोसँग दूरी बनाउँदै आएको थियो। तर, युक्रेनमा रुसी आक्रमणपछि ऐतिहासिक कदम उठाउने पक्षमा उभिएको छ। आगामी बिहीबारसम्ममा फिनल्यान्ड नेटोमा सामेल हुनेबारे अन्तिम निर्णय भइसक्नेछ। स्विडेनले पनि आइतबारसम्ममा अन्तिम निर्णय गर्दैछ।