काठमाडौं- माओवादी केन्द्रका अध्यक्ष पुष्पकमल दाहाल ‘प्रचण्ड’ले चितवन भरतपुरमा रेणु दाहाल मेयर निर्वाचित नभए देश दुर्घटनामा जाने सक्ने भन्दै दिएको अभिव्यक्तिप्रति निर्वाचन आयोगले जाँचबुझ थालेको छ।

गत बिहीबार भरतपुरमा आयोजित सत्ता गठबन्धनको चुनावी सभामा बोल्दै प्रचण्डले भरतपुर महानगरपालिकामा रेणु दाहाल निर्वाचित नभए देश दुर्घटनामा जाने चेतावनी दिएका थिए।

प्रचण्डको भनाइबारे प्रमुख प्रतिपक्षी दल एमालेले प्रश्न उठाउनुका साथै उजुरीसमेत परेपछि आयोगले आन्तरिक रूपमा छानविन थालेको हो।

उनको त्यो चेतावनीको चौतर्फी आलोचना भएको थियो। मतदातालाई धम्क्याएको र भयरहित निर्वाचनको वातावरण बिथोलेको भन्दै उनीविरुद्ध उजुरी परेको हो।