पाँचदलीय गठबन्धनको तर्फबाट काठमाडौं महानगरपालिकामा मेयर उम्मेदवार सिर्जना सिंहले महानगरलाई एउटा महान घर बनाउने बताएकी छन्।

पाँच दलीय गठबन्धनको चुनावी सभामा बोल्दै उनले भनिन्, ‘महानगरवासीलाई हरेक किसिमको सेवा सुविधा चुस्तदुरुस्त बनाउने छु, महानगरभित्र रहेका सडकको समस्या, ट्राफिक जामको समस्या अन्त्य गर्नेछु। सामाजिक सुरक्षा दिनेछु।’

काठमाडौको फोहोर व्यवस्थापन गर्ने र वागमती, विष्णुमती नदीलाई सफा राख्नका लागि काम गर्ने उनले बताइन्। साथै, महानगरभित्रका नेवार संस्कृति र सम्पदाका साथै सबै जातजातिको धर्म, संस्कृति र सम्पदालाई जगेर्ना गर्ने बताइन्।

महिलाहरूले उत्पादन गरेका सबै वस्तुलाई बजारीकरण गर्न कोशेली घरको स्थापना गर्ने, अन्तर्राष्ट्रिय बजारमा पुर्‍याउन काम गर्ने उनले बताइन्। साथै, घोषणापत्रमा लेखेका सबै काम पूरा गर्ने सिंहले बताइन्।