सुनसरी बराहक्षेत्र नगरपालिकामा गठबन्धनको दाउ छ एमालेको विरासत भत्काउने र एमाले पनि एउटै अर्जुनदृष्टिमा छ, लालकिल्ला जोगाउने
सुनसरी- २०७४ सालको पालिका चुनावमा सुनसरी बराहक्षेत्र नगरपालिका प्रमुखमा एमालेका निलम खनालले १४ हजार ४४६ मत ल्याएर विजयी भएका थिए भने उनका निकटतम प्रतिद्वन्द्वी कांग्रेसका बाबुराम बिष्टले ११ हजार ४८९ मत प्राप्त गरेका गरेका थिए।
त्यतिबेला माओवादी केन्द्रका कमलबहादुर कट्वालले २ हजार ७३८ मत प्राप्त गरेर तेस्रो स्थान हासिल गरेका थिए। यसपटकको चुनावमा एमालेले नगर प्रमुख निलम खनाललाई पुनः दोहोर्याएको छ। उनी एमाले सुनसरी जिल्ला उपाध्यक्ष पनि हुन्।
एमाले नेता खनाल आफ्नो राजनीतिक विरासत कायम गर्दै नगर प्रमुख र उपप्रमुखसहित सबै सदस्यहरूमा जित निकाल्नै लक्ष्यका साथ चुनावी मैदानमा होमिएका छन्।
यसपटकको चुनावमा कांग्रेसलाई माओवादी केन्द्रसहित गठबन्धन दलहरूको साथ छ। गठबन्धनका तर्फबाट कांग्रेसका युवा नेता रमेश कार्की मेयर उम्मेदवार बनेका छन्। उनको एउटै लक्ष्य देखिन्छ, एमालेको लालकिल्ला भत्काउने। उनी पनि नगर प्रमुख, उपप्रमुख र११ वटै वडाध्यक्ष जित्ने दाउमा लागिपरेका छन्।
२०७४ सालको निर्वाचनमा बराहक्षेत्र नगरपालिकामा कांग्रेसले एक्लै चुनावी प्रतिस्पर्धामा होमिँदा दोस्रो स्थान प्राप्त गरेको थियो। यसपटक माओवादी केन्द्रको साथ रहेकाले सहजै जित हासिल हुने कार्कीको ठम्याइ छ।
यसपटक बराहक्षेत्र नगरपालिकाको चुनावी माहोलमा नगर प्रमुख, उपप्रमुखदेखि सदस्यसम्म कांग्रेस र एमालेबीच कडा प्रतिस्पर्धा हुने आकलन नगरवासीको देखिन्छ।
२०७४ सालको चुनावमा बराहक्षेत्रमा एमालेले नगर प्रमुख, उपप्रमुख सहित ३, ४, ५, ७, ८, ९, १० र ११ गरी ८ वडाध्यक्ष जितेको थियो। त्यतिबेला कांग्रेसले तीन वडाध्यक्षमै चित्त बुझाएको थियो, वडा नम्बर १ मा सुरेश श्रेष्ठ, २ मा हरिकृष्ण भट्टराई र ६ मा उद्वव पोखरेल।
गठबन्धनको चुनावी रणनीति तय गर्ने जिम्मेवारी रेवतीरमण दुलालले पाएका छन्। उनी भन्छन्, ‘यसपटकको निर्वाचनमा नगरप्रमुख, उपप्रमुखसहित ११ वटा वडाध्यक्ष जित्ने लक्ष्यका साथ लालकिल्ला ढाल्छौँ।’ उनी गठबन्धनका उम्मेदवारहरूलाई जिताउन सफल या असफल के हुन्छन्, चुनावी परिणामले नै देखाउने छ।
एमालेले बराहक्षेत्रमा निर्वाचन परिचालन कमिटीको संयोजकको जिम्मेवारी बद्रीनाथ धिमिरेले पाएका छन्। उनी पनि नगरप्रमुख, उपप्रमुखसहित ११ वटै वडाध्यक्ष जिताउने अभियानमा छन्। र, उनको मुख्य ध्येय देखिन्छ, ०७४ सालको लाल किल्लाको विरासत जोगाउने। लालकिल्ला जोगाउने र भत्काउने यो खेलमा कसले बाजी मार्छ भन्ने हेर्न ३० वैशाखपछि आउने चुनावी नतिजासम्म पर्खिनैपर्ने भएको छ।
यी हुन् गठबन्धनका उम्मेदवार
नगर प्रमुख : रमेश कार्की
उपप्रमुख : अमित गौतम
वडाध्यक्षहरू
वडा १: सुरेश श्रेष्ठ
वडा २: नारायण नेपाल
वडा ३: राजदीप लामा
वडा ४: नुतन धामी
वडा ५: रोहित काफ्ले
वडा ६: उद्धवप्रसाद पोखरेल
वडा ७: कपिल आचार्य
वडा ८: रोशन खड्का
वडा ९: निरन्जन चन्द्रवंशी
वडा १०: तेज गुरुङ
वडा ११: कृष्णकुमार महतो
एमालेका उम्मेदवार
नगर प्रमुख : निलम खनाल
उपमेयर : नन्दकुमारी राई
वडाध्यक्षहरू
वडा-१: किसन थापा मगर
वडा-२: होमप्रसाद गौतम
वडा-३: रुद्रबहादुर दाहाल
वडा-४: आशाराम चौधरी
वडा-५: देवेन्द्रबहादुर बिष्ट
वडा-६: टेकेन्द्र कार्की
वडा-७: होमनाथ निरौला
वडा-८: भानु लिम्बू
वडा-९: दीपक लिम्बू
वडा-१०: मणिराज तामाङ
वडा-११: गोकुल श्रेष्ठ
