काठमाडौं- पालिका चुनावमा आर्थिक लाभ लिएर टिकट वितरण गरिएको आरोप लगाउँदै कांग्रेसको मधेश प्रदेशका सह-महामन्त्री जयनारायण यादवले पदबाट राजीना दिएका छन्।

प्रदेश कार्यसमितिले विधानविपरीत टिकट वितरण गरेको उनको आरोप छ। पार्टीका प्रदेश सभापति कृष्ण यादव र उपसभापति चन्द्रशेखर यादवले उम्मेदवारहरूबाट आर्थिक लाभ लिएको आरोप पनि उनले लगाएका छन्।

पार्टी सभापति तथा प्रधानमन्त्री शेरबहादुर देउवाका स्वकीय सचिवलाई नै त्यसबारे जानकारी गराउँदा पनि सुनुवाइ नभएपछि पदबाट राजीनामा दिएको उनको भनाइ छ। वडा, प्रदेश क्षेत्रीय समिति, संसदीय क्षेत्रीय समिति र जिल्ला समितिबाट सिफारिस भएका उम्मेदवारलाई टिकट नदिइएको उनले बताए। प्रदेश सभापति र उपसभापतिले आफूखुशी टिकट वितरण गरेको उनको आरोप छ।