काठमाडौं महानगरपालिकामा एमाले मेयरको उम्मेदवार बनाएका केशव स्थापितले गर्ने गालीको वर्षा रोकिएको छैन। उनी निरन्तर कसै न कसैमाथि गाली बर्साइरहेकै छन्।

१५ वैशाखमा धुम्बाराहीस्थित नेसनल कलेजले आयोजना गरेको कार्यक्रममा आफूमाथि लागेको ‘मी टु’को आरोपबारे अभियानकर्मीले सोधेको प्रश्न भद्रतापूर्वक जवाफ दिन चुके। र, उल्टै प्रश्नकर्तामाथि खनिए, ‘यी युवतीको फेस नाइस छ तर थुतुनो ठीक छैन।’ सार्वजनिक मञ्चमै उनले प्रयोग गरेको भाषाको सामाजिक सञ्जालमा आलोचना मात्र होइन, मानव अधिकारवादी संघसंस्थाले विज्ञप्तिमार्फत कारवाही माग गरेका छन्।

त्यतिमा उनी रोकिएका छैनन्। किनकि, उनको अभिव्यक्तिलाई एमाले अध्यक्ष केपी ओलीले सार्वजनिक रूपमै बचाउ गरिदिन्छन्। त्यसैले उनी अझ उत्साहित हुँदै गाली बर्साइरहेकै छन्।

त्यसको पछिल्लो उदाहरण हो, आइतबार आयोजित एक कार्यक्रममा काठमाडौं महानगरका अर्का मेयर प्रत्यासी बालेन शाहमाथि बर्साएको गाली। स्थापितले बालेनलाई ‘अन्तर्राष्ट्रिय ठग’कै संज्ञा दिन भ्याए। उनले भने, ‘एउटाचाहिँ बालेन शाह भन्ने रैछ, त्यो त अन्तर्राष्ट्रिय ठग रैछ। ‘युवाहरूले सुनौं है, ऊ के रहेछ भने हिजो टिकटक हेरेको त उसले मसँग परिचय गर्दाखेरि पनि म काठमाडौंमा जन्मेको, मचाहिँ पहाडिया ठकुरी भन्छ क्या। बालेन शाह। हिजो के कुरा खुल्यो भने यहाँको शाह नै हैन रैछ, मधेशतिरको शाह रै’छ हेर्नोस्।’

उनले बालेनले लगाउने चश्मामाथि पनि टिप्पणी गर्न भ्याए। र, भने, ‘जहिले पनि चश्मा खोल्दैन, जनतासँग आँखा जुधाएर हेर्ने तागतै रहेनछ। यस्तो मान्छे पनि उम्मेदवार हुन्छ? युवाहरूसँग फेस टु फेस बसेर कुरा गर्नुप¥यो नि।’ बालेनलाई काठमाडौंको जनसंख्या कति हो भन्नेसमेत थाहा नभएको उनको आरोप थियो।