बिहानैदेखि धुम्मिएको मौसमका कारण कतार एयरवेजको विमानले त्रिभुवन अन्तर्राष्ट्रिय विमानस्थलमा ओभरसुट गरेको छ।

‘मिस अप्रोच’का कारण उक्त विमानले ओभरसुट गरेको विमानस्थल स्रोतले जानकारी दिएको छ। काठमाडौंमा खराब मौसमका कारण उक्त विमान बारा, पर्साको आकाशमा एक फन्को लगाएर त्रिभुवन विमानस्थलमा अवतरणका लागि आएको थियो।

‘फेरि फर्केर आउन पनि सक्छ। अहिले टावरलाई के कारणले ओभरसुट गर्नु परेको हो भन्ने चालक दलले बताइसकेको छैन,’ विमानस्थल स्रोतले नेपाली हेडलाइनसँग भन्यो। खराब मौसमका कारण आन्तरिक उडानतर्फ पनि कतिपय जहाज अन्यत्र डाइभर्ट भएका छन्।

काठमाडौंको खराब मौसमका कारण मलेसियाको क्वालालम्पुरबाट आउँदै गरेको नेपाल वायु सेवा निगमको न्यारोबडी विमान पनि नेपाल-भारत सीमा क्षेत्रको आकाशमा घुमिरहेको छ।