विश्वका शक्तिशाली नेतामा गनिने रुसी राष्ट्रपति भ्लादिमिर पुटिनको व्यक्तिगत जीवन रहस्यले भरिएको छ। उनको निजी जीवनका धेरै पक्ष सार्वजनिक भएका छैनन्।
उनका व्यक्तिगत जीवनका पाटाहरूबारे अनेक अड्कलबाजी हुने गर्छन्। पछिल्लो समय सार्वजनिक भएको एक भिडियोका आधारमा पुटिन गम्भीर रोगसँग जुधिरहेको हुनसक्ने आशंका गर्न थालिएको छ। भिडियोमा पुटिन कुनै रोगीजस्तो हाउभाउ गरिरहेका देखिन्छन्।
पश्चिमा मुलुकका सञ्चार माध्यमले पुटिन थाइरोयडको क्यान्सर वा पार्किन्सन्ससँग जुधिरहेको हुनसक्ने अनुमान गरेका छन्। पुटिनको वरिपरि हिँड्ने केही व्यक्ति क्यान्सर विशेषज्ञ भएको पनि दाबी पनि पश्चिमा सञ्चार माध्यमको छ। उनकै नजिकका व्यक्तिहरूले पनि पुटिनले क्यान्सरका बिरामीले खाने स्टेरोयड खाइरहेको बताएका छन्।
चर्चामा रहेको भिडियोमा पुटिन उनका रक्षामन्त्री सर्गेई सोइगुसँग देखिन्छन्। सो भेटघाट अवधिभर पुटिन टेबलको एउटा कुना समातिरहेका देखिन्छन्। उनको दाहिने हातको औँला मात्रै हल्लिरहेको देखिन्छ। उनी असहज ढंगले हलचल गरिरहेको, जिब्रो बाहिर निकालेको र ओठ टोकेको अवस्थामा देखिन्छन्। उनी कहिले सिलिङ त कहिले भुइँमा हेरिरहेका थिए। र, आफूलाई नियन्त्रित देखाउन धेरै सावधान देखिन्थे।
भिडियोमा उनको अनुहार पनि सुन्निएको जस्तो देखिन्छ। किमोथेरापी गरिरहेका वा स्टेरोइड खाने व्यक्तिमा यस्ता लक्षण देखिने बताइन्छ। यस्तै, भिडियोमा पुटिनको खुट्टा लगातार हल्लिइरहेको पनि देखिन्छ, जुन पार्किन्सन्स रोगको लक्षण हो।
केही सञ्चार माध्यमले भिडियोमा देखिएका रक्षामन्त्री सोइगु तनावमा देखिएको र उनले पहिले कसैले लेखिदिएको स्क्रिप्ट पढिरहेको औंल्याएका छन्। सोइगु लेखिएको पढ्दा पनि भक्भकाइरहेको, उनको शब्द पनि स्पष्ट नबुझिएको केहीले ठम्याएका छन्।
यसअघि मन्त्री सोइगुलाई हृदयाघात भएको समाचार सार्वजनिक गरिएको थियो। चर्चामा रहेको भिडियोमा दुई नेता युक्रेन युद्धबारे चर्चा गरिरहेका देखिन्छन्। रुस–युक्रेन युद्ध शुरु भएको दुई महिना नाघिसकेको छ। यसैबीच रुसी सेनाले युक्रेनको सबैभन्दा ठूलो बन्दरगाह शहर मारियापोलमाथि कब्जा जमाएको छ। सोही विजयबारे कुरा गर्न पुटिन र रक्षामन्त्री सोइगुसँग भेटघाट भएको थियो।
यस्तै, अर्को एक सार्वजनिक कार्यक्रममा अर्थोडक्स इस्टरको अवसरमा मध्यरातमा चर्चमा आयोजित धार्मिक समारोहमा मैनबत्ती समात्दै देखिएका पुटिन अस्थिर देखिएको सार्वजनिक भएको थियो। यी कुरालाई हेरर उनलाई या पार्किन्सन या प्राणघातक क्यान्सर भएको अनुमान गरिएको छ।
