सुनसरीको बराहक्षेत्र-२ स्थित आदर्श सामुदायिक वन उपभोक्ता समूहको १४ औं वार्षिक साधारण सभाले शनिबार वार्षिक प्रगति प्रतिवेदन र आयव्यय अनुमोदन गर्दै सम्पन्न गरेको छ ।
सभामा आर्थिक वर्ष २०८१/८२ सालको प्रगति प्रतिवेदन अध्यक्ष टेकमाया पाण्डेले प्रस्तुत गरिन् । यस्तै आगामी कार्ययोजनाका लागि सचिव अमर कट्वालले अनुमानित आम्दानी खर्चको विवरण प्रस्तुत गरे ।
प्रगति प्रतिवेदन प्रस्तुत गर्दै अध्यक्ष पाण्डेले गत आर्थिक वर्ष २०८०/८१ मा विपन्न वर्गका उपभोक्ताको स्वास्थ्य बिमा, वृक्षरोपण, काठदाउरा वितरण, हात्ती नियन्त्रणको प्रयास, समूहको निर्माणाधीन भवनको ढलान, सडक ग्राभेल र खेलकुदका लागि सहयोग गरिएको उल्लेख गरिन् ।
अध्यक्ष पाण्डेले सभामा चालु आर्थिक वर्षमा समूहको स्वीकृत विधान एवम् कार्ययोजनामा उल्लेख भएको कार्यविवरण प्रस्तुत गरिन् ।
सभामा वन समूहका सचिव कट्वालले आर्थिक वर्ष २०८१/८२ को अनुमानित आम्दानी ५६ लाख ३८ हजार रुपैयाँ रहेको विवरण पेश गरे, यस्तै सचिव कट्वालले ४ लाख ६० हजार प्रशासनिक अनुमानित खर्च प्रस्तुत गरे भने वन समूहले गरिबी निवारण,विकास निर्माण,वन विकासमा खर्च गर्ने विवरण प्रस्तुत गरे ।
लेखा समिति सदस्य लेखनाथ खतिवडाले आव २०८०/८१ को आम्दानी र बाँकी बक्यौता विवरण सभामा प्रस्तुत गरे । उनले आर्थिक वर्ष २०८०/८१ मा वन समूहले १६ लाख ९५ हजार ८ सय ६९ रुपैयाँ ९७ पैसा आम्दानी गरेको विवरण प्रस्तुत गरे ।
साधारण सभाको औपचारिक उद्घाटन कोशी प्रदेशकी सांसद ममता तामाङ मगरले बिरुवामा पानी हालेर गरेकी थिइन् ।विशिष्ट अतिथि बराहक्षेत्र-२ का वडाध्यक्ष होमप्रसाद गौतमले वन समूहले आर्थिक मितव्ययिता पालना गर्नुपर्ने सुझाव दिए ।
यस्तै अतिथिका रुपमा आमन्त्रित विभिन्न वन समूहका अध्यक्षहरुले वन संरक्षण र वृक्षरोपणको महत्वबारे विचार राखेका थिए ।
बराहक्षेत्र-२ स्थित तरी वन चारकोशे झाडीमा पर्ने उपभोक्ता समूहको आवादी र वन क्षेत्र गरी ४ सय ५ हेक्टर रहेको छ । १०७.२९ हेक्टर आवादी र २०२.७ हेक्टरमा वन रहेको छ ।
अग्रज र पूर्व अध्यक्षलाई सम्मान
वन समूहले वन समूहका अग्रज उपभोक्ता तथा पूर्व अध्यक्षलाई सम्मान गरेको छ । सम्मानित हुने अग्रजहरुमा भक्तबहादुर बस्नेत र ध्यानबहादुर सुनुवार रहेका छन् । यस्तै वन समूहका पूर्व अध्यक्ष सुरेशमणि नेपाललाई सम्मान गरिएको सचिव अमर कट्वालले जानकारी दिए ।
