भगवान् वराह र धरणीको बीचमा विवाह भएको पौराणिक मान्यतालाई निरन्तरता दिंदै वराहक्षेत्र धाममा विवाह महोत्सव आयोजना गरिएको छ ।

पहिलो दिन आज गुप्त वराहस्थलबाट धरणी अर्थात भूदेवीको डोली वराहक्षेत्र प्रस्थान गरेको छ । धनुर्मास उत्सव अन्तर्गत श्रीधरणीधर विवाह उत्सव आयोजना गरिएको पण्डित योगेश भण्डारीले जानकारी दिए ।

विवाह उत्सवको पहिलो दिन भूदेवी धरणीको विशेष पूजा, आराधना, होम, पाठ, सत्सङ्ग र शोभायात्रा आयोजना गरिएको छ । वराहक्षेत्रबाट पत्रसहित आएका जन्तीलाई गुप्त वराहमा बेहुली पक्षले स्वागत गरेका छन् । आजै आइतबार गुप्तवराहको प्रवेशद्वारमा रहेको धरणी मन्दिरमा पाठ एवं मन्त्र जपसहित बेहुली पक्षबाट गरिने कार्य सम्पन्न गरी बेहुलीलाई डोलीमा राखी वराहक्षेत्र लगिएको छ ।

वराह मन्दिरमा पुर्याइएकी भूदेवी धरणीलाई भोलि सोमबार १००८ घडा जलद्वारा भगवानको मङ्गलस्नान गरिने छ । सोही दिन स्वयंवर, कन्यादान, सिन्दूर दानलगायतका पौराणिक वैवाहिक कार्यक्रम आयोजना हुने पण्डित भण्डारीले जानकारी दिए ।

आज रात्रिमा वराह मन्दिर प्राङ्गणमा भजन-कीर्तन, भगवानको महिमा गानसहितका धार्मिक कार्य गरिने वराहक्षेत्र मन्दिर गुठी व्यवस्थापन समितिका अध्यक्ष भक्तबहादुर श्रेष्ठले जानकारी दिए ।

“धर्मपिता र धर्म माताको स्थापना गरी विधिसम्मत विवाह उत्सव शोभायात्रा र यज्ञ गरी समापन गरिने छ र प्रसाद वितरण गरिने छ,” पण्डित भण्डारीले भने, ‘भगवान् विष्णुले श्रीवराहको अवतार धारण गरेर धरणीलाई शीरमा धारण गर्नुभएकाले उहाँलाई धरणीधर भनिएको हो, धरणी भनेको पृथ्वी (भूदेवी) र धरको अर्थ धारणा गर्नु (बोक्नु) भन्ने बुझिन्छ ।’

पण्डित भण्डारीका अनुसार लीलाविग्रहमा समेत लक्ष्मीजीका साथमा नारायण, सीताजीका साथमा श्रीराम, राधाजीका साथमा श्रीकृष्ण, पद्मावतीका साथमा श्रीवैङ्कटेस, रङ्गनायकीका साथमा श्रीरङ्गनाथ भगवान् साथमा भए झैं धरणीका साथमा सदासर्वदा भगवान् वराह विराजमान हुन्छन् ।

विवाह महोत्सवमा भक्तजनलाई आशीर्वचन प्रदान गर्दै जगदगुरु महायोगी सिद्धबाबाले चलन चल्तीको भाषामा विवाह उत्सव भनिए पनि यो भगवानको मङ्गल कार्य भएको बताए । उनले सन्तान प्राप्ति र आपसी प्रेम वृद्धिका लागि भगवानको मङ्गल कार्यमा सहभागी हुनुपर्ने बताए ।

तीन हजार वर्षअघिको इतिहास बोकेको वराहक्षेत्र मन्दिर हिन्दू धर्मका चार प्रमुख धाममध्ये एक धामका रूपमा रहेको छ । प्राचीन पूर्वीय संस्कृति तथा परम्परा अनुसार वराहक्षेत्र धाममा रहेको वराह भगवान् विष्णुका १० अवतारमध्ये तेस्रो अवतार हुन् । शास्त्रअनुसार रसातालमा भासिएको पृथ्वीलाई वराह भगवानले पूर्ववत उद्धार गरी यस धराधाममा स्थापित गरेको र भगवान यहीँ यज्ञ वराहका रुपमा स्थपित भएकाले वराहक्षेत्र तीर्थलाई धर्तीको पहिलो तीर्थका रुपमा लिइएको मान्यता छ ।