काठमाडौँ । हेटौँडा उपमहानगरपालिका ९ मा निर्माण हुँदै गरेको मदन भण्डारी र जीवराज आश्रितको शालिक तोडफोड भएको छ ।

दिब्य बाल उद्यानमा रहेको उक्त शालिक अज्ञात समूहले तोडफोड गरेका हुन् । बिहान पार्कमा मर्निङवाक गर्न आएका स्थानीयले शालिक तोडफोड भएको देखेपछि पार्क व्यवस्थापन समितिलाई खबर गरेका थिए ।

तोडफोडपछि मदन भण्डारीको शालिकको शिर भाँचिएको र आश्रितको पूरै शालिक उखेलेर फालिएको अवस्थामा फेला परेको थियो ।

पार्कमा रहेका अन्य संरचना यथावत अवस्थामा रहेको छ । इलाका प्रहरी कार्यालय पशुपतिनगरका प्रमुख प्रहरी निरीक्षक अविनाश अधिकारीसहितको टोलीले घटनाबारे अनुगमन गरिरहेको छ ।