रुस र युक्रेन युद्ध चलिरहेको समयमा रुसले अन्तरमहादेशीय ब्यालेस्टिक मिसाइल परीक्षण गरेको छ। रुसी राष्ट्रपति भ्लादिमिर पुटिनले यसलाई बेजोड भएको बताउँदै गुनगान गरेका छन्। अमेरिकाले भने यो परीक्षणलाई सामान्य भएको बताएको छ।
अमेरिका र पश्चिमा मुलुकसँग जारी तनावको समयमा रुसले अन्तरमहादेशीय ब्यालेस्टिक मिसाइलको सफल परीक्षण गरेको हो। यो लामो दूरीमा प्रहार गर्न सक्ने क्षमता भएको मिसाइलले एकैपटकमा धेरै आणविक हतियार बोक्न सक्ने बताइएको छ।
रुसको उक्त सफलतामा खुशी व्यक्त गर्दै राष्ट्रपति पुटिनले यो क्षेप्यास्त्रले शत्रु राष्ट्रलाई चिन्तामा पारेको दाबी गरेका छन्।
अमेरिकाले भने यसलाई ब्यालेस्टिक मिसाइलको सामान्य परीक्षण मात्र भएको बताएको छ। अमेरिकालाई रुसले परीक्षण गरेको उक्त मिसाइलको कुनै वास्ता नभएको अमेरिकाले उल्लेख गरेको छ।
राष्ट्रपति पुटिनले उक्त मिसाइल बेजोड क्षमताको भएको बताएका छन्। उनले भने, ‘यो क्षेप्यास्त्र प्राविधिक रूपले गुण तथा विशेषताले भरिएको छ। यसमा एन्टिमिसाइल क्षमता छ। क्षेप्यास्त्र विरोधी प्रणालीको कारण आक्रमणबाट बच्दै लक्ष्यहरूमा आक्रमण गर्न यो सक्षम छ।’
पुटिनले उक्त मिसाइलले एकै साथ १० वा त्यसभन्दा बढी आणविक बम बोक्न सक्ने र एकैपटकमा धेरै लक्ष्यमा प्रहार गरी नष्ट गर्न सक्ने क्षमता भएको बताए। पुटिनको भनाइअनुसार अहिलेसम्म विश्वमा यससँग तुलना गर्न मिल्ने मिसाइल छैनन्।