मनिष अर्याल
कांग्रेसको भातृ संगठन नेविसंघले आफ्नो ५३औँ स्थापना दिवस मनायो, देशभर। काठमाडौं राष्ट्रिय सभागृहमा आयोजित समारोहको प्रमुख अतिथि थिए, कांग्रेस सभापति तथा प्रधानमन्त्री शेरबहादुर देउवा।
समारोहलाई सम्बोधन गर्दै देउवाले हालको सत्तारुढ गठबन्धन टुटाउने षड्यन्त्र भइरहेको दाबी गरे। र, गठबन्धनले कांग्रेसलाई फाइदा पुगेको जिकिर गर्दैै उनले भने, ‘धेरै प्रदेशमा मुख्यमन्त्री र मन्त्री पाएका छौँ, कांग्रेसमा मैले राम्रो काम गरेजस्तो लाग्छ, गठबन्धन अहिले तोड्नु हुँदैन, निर्वाचनमा एक्लै कुनै पार्टीको बहुमत ल्याउने अवस्था छैन, त्यसैले गठबन्धनलाई अगाडि लिएर जानुपर्छ।’
जबसम्म गाउँ र स्कुल तहमा नेविसंघ गठन हुन सक्दैन, तबसम्म संगठन बलियो हुन नसक्ने देउवाले बताए। ‘नेविसंघको संगठन देशभरका कलेज र क्याम्पससम्म फैलिएको छ, तर पनि हामी किन स्ववियु निर्वाचनमा हारिरहेका छौँ, यसबारे नेविसंघ गम्भीर हुनुपर्छ, स्कुल जित्न सके मात्र कलेज र क्याम्पसमा जित्न सक्छौँ,’ उनले भने।
समारोहमा देउवाले नेविसंघका संस्थापक सभापति विपिन कोइराला, उपसभापति सनद रेग्मी, महामन्त्री टीका पोखरेल, सदस्य रामचन्द्र पौडेल, सुरेन्द्रबहादुर बिष्ट, केदार न्यौपाने, भरत पाण्डे, दामोदर गौतम, चक्रराज पन्त, वसन्त गुरुङ, राजेन्द्रबहादुर शाहलगायतलाई सम्मान गरे।
