सत्तारुढ चार दलले ६ वटा महानगरका मेयर उम्मेदवारमा भागबण्डा टुंग्याएका छन्। मंगलबारसम्मको सघन छलफलपछि गठबन्धनले भागबण्डा टुंग्याएको हो।
गठबन्धनको निर्णयअनुसार काठमाडौं, ललितपुर र विराटनगरमा कांग्रेसका मेयर उम्मेदवारलाई अन्य दलले साथ दिने भएका छन्। यस्तै, माओवादी केन्द्रले भरतपुर, जसपाले वीरगञ्ज र एकीकृत समाजवादीले पोखरा महानगरको मेयरमा उम्मेदवारी दिने भएका छन्। सबै महानगरमा उपमेयरको भागबण्डा भने टुंगिएको छैन।
पोखरा र भरतपुर महानगरको मेयर आफूले पाउनुपर्ने माग कांग्रेसका स्थानीय नेतृत्वले गर्दै आएका छन्। विद्रोह रोक्ने उद्देश्यले कांग्रेस सभापति तथा प्रधानमन्त्री शेरबहादुर देउवाले दुवै महानगरका कांग्रेस सभापतिलगायत नेताहरूलाई काठमाडौं बोलाएर छलफल गरेका थिए।
महानगरका उपप्रमुख तथा ११ वटा उपमहानगरपालिकाका प्रमुख र उपप्रमुखबारे मंगलबार नै भागबण्डा टुंगिन सक्ने कांग्रेसका एक नेताले जानकारी दिए।
