मनिष अर्याल
वसन्त ऋतु अर्थात् फूलै फूलको मौसम। नयाँ पालुवामा सजिएका छन्, वासन्ती यामका वनस्पति। यही बेला फुलेको ज्याकारान्डाले काठमाडौं उपत्यकालाई वैजनी रंग दिएको छ।
वसन्त बहार दिँदै सडकका दायाँ-बायाँ फुलेका ज्याकारान्डा फूलले उपत्यकालाई बैजनी सौन्दर्य दिएका छन्। यस्तो लाग्छ, बैजनी बगैंचामा परिणत भएको छ, काठमाडौं।
दरबारमार्ग, रत्नपार्क, सुन्धारा, सिंहदबार वरिपरि तथा चक्रपथ सडकका दायाँ-बायाँ फुलेका ज्याकारान्डाले काठमाडौंलाई मनमोहक बनाएका छन्। चढ्दो गर्मीबीच उपत्यकाका सडकमा बटुवालाई प्रफुल्लित बनाएका छन्, ज्याकारान्डा फूलले।
अघिल्ला दुई वर्ष ज्याकारान्डा फुल्दा उपत्यकावासी घर-घरमै कैदझैं थिए। पहिलो वर्ष कडा लकडाउनमा थियो, पूरै मुलुक। दोस्रो वर्ष पनि निषेधाज्ञा शुरु भइसकेको थियो।
अहिले काठमाडौँ आसपासमा फूलेको यो फूल ज्याकारान्डा मिमोसिफोलिया प्रजातिको हो। यसको पात र शिरिषको फूलको पात उस्ताउस्तै भएकोले गर्दा यसलाई नीलो शिरिष पनि भन्ने गरिन्छ। तथापि, यो रैथाने होइन, आगन्तुक वनस्पति हो। कसै-कसैले यसलाई पाहुना फूल पनि संज्ञा दिएका छन्। तत्कालीन राजा वीरेन्द्रका पालामा भित्रिएको भएर त्यसबारे जानकारी राख्नेहरूले यसलाई वीरेन्द्र फूल पनि भन्छन्।
