काठमाडौँ । प्रधानमन्त्री शेरबहादुर देउवाले गठबन्धन भत्काउन षडयन्त्र भइरहेको बताएका छन् । यस्तो अवस्थामा उनले सबै मिलेर गठबन्धन जोगाउन ध्यान दिन नेता कार्यकर्तालाई आग्रह गरे ।
‘गठबन्धन टुटाउने षडयन्त्र भइरहेको छ,’ नेविसंघको स्थापना दिवसको अवसरमा आयोजित कार्यक्रमलाई सम्बोधन गर्दै देउवाले भने, ‘तर गठबन्धन तोड्न हुन्न ।’
उनले पाँच दलीय गठबन्धनबाट कांग्रेस पार्टीले प्रधानमन्त्री पाएको बताउँदै चुनावसम्म सहकार्य हुने बताए। उनले गठबन्धनका दलहरूलाई चुनावमा उचित स्थान दिने बताए ।
‘कांग्रेस ठूलो पार्टी छ धेरै सिट लिनुस्, हामीलाई पनि केही सिट दिनुस् भनेका छन्, उनीहरूलाई पनि स्थान दिनुपर्छ, गठबन्धन बचाउनु पर्छ,’ देउवाले भने ।
विगतमा एमाले र माओवादी मिल्दा कांग्रेस अवस्था दर्शाउँदै उनले गठबन्धन आवश्यक रहेको बताए । यस्तै, उनले गठबन्धनका कारण प्रदेशहरूमा पनि आफ्नो पार्टीको सरकार आएको बताए ।
