भरतपुर- माओवादी केन्द्रका अध्यक्ष पुष्पकमल दाहाल ‘प्रचण्ड’को घर भएको वडा हो, भरतपुर महानगरपालिका-१४। उनको वडामा आगामी पालिका चुनावका लागि वडाध्यक्षमा आठ जनाको नाम सिफारिस भएको छ।
सोमबार भरतपुर पटिहानीमा बसेको माओवादी केन्द्र वडा कमिटीको पूर्ण बैठकले आठजना वडाध्यक्षसहित १२ जना सदस्य पदमा सिफारिस भएका हुन्। सिफारिस भएकाहरू प्रदेश कमिटी सदस्यदेखि पत्रकारसम्म छन्।
प्रदेश कमिटी सदस्य विष्णुकुमारी चौधरी, महानगर सदस्य हरिश्चन्द्र दाहाल, वडा इन्चार्ज देवीराम पौडेल, अध्यक्ष बाबुराम दाहाल, बालकृष्ण ढकाल, विमला विक, केदार पौडेल र मिलन अधिकारी अध्यक्षका दाबेदारका रूपमा वडा कमिटीबाट सिफारिसमा परेका छन्।
यस्तै, महिला सदस्यका लागि विष्णुमाया सापकोटा र निर्मला भण्डारी, दलित महिला सदस्यका लागि पार्वती विक र शान्ति रसाइली छन्। खुला सदस्यका लागि पश्चिम चितवन पत्रकार मञ्चका उपाध्यक्ष अनिल भट्टराईसमेत छन्। अखिल क्रान्तिकारी भरतपुरका अध्यक्ष पिंगलराज पन्त, वाईसीएलका नेता दीपेन्द्र पौडेल, राजन विक, हरिभक्त पौडेल, बालकृष्ण गौतमसहित रामचन्द्र दाहाल र जीवन कँडेल खुला सदस्यमा सिफारिस भएको वडा कमिटी अध्यक्ष बाबुराम दाहालले जानकारी दिए।
अध्यक्ष प्रचण्डको गृह वडासमेत भएकोले यस क्षेत्रलाई अर्थपूर्ण रूपमा हेरिरहेको छ। तीन दलीय गठबन्धन प्रभाव रहेको वडामा पदाधिकारीका व्यवस्थापन सहमतिका आधारमा हुने चर्चा छ। कांग्रेससँग गठबन्धन कमजोर रहेको बताउँदै प्रदेश कमिटी सदस्य विष्णुकुमारी चौधरीले आफूहरू एकीकृत समाजवादीसँग मिलेर अघि बढ्दा भागबण्डा हुनसक्ने बताए।
