पेरिस- फ्रान्सको राष्ट्रपतीय चुनावकी दक्षिणपन्थी उम्मेदवार मरिन ल पेनले सार्वजनिक स्थलमा मुस्लिम महिलाले टाउकोमा लगाउने हेडस्काफमा प्रतिबन्ध लगाउने उनको मागलाई पुनः जोड दिएकी छन्। मुस्लिम महिलाले लगाउने हेडस्काफ शुरुदेखि नै यसपटकको राष्ट्रपति चुनावको मुख्य मुद्दामध्ये एक बनेको छ।
ल पेनले हेडस्काफ फ्रान्सको आधारभूत सिद्धान्त धर्मनिरपेक्षतावाद विरुद्ध रहेकाले यसलाई छुट दिन नमिल्ने बताएकी छन्। मुसलमान महिलाले पूरा शरीर ढाक्ने गरी लगाउने बुर्का र टाउको छोप्न प्रयोग गर्ने हेडस्काफ लामो समयदेखि फ्रान्सको राजनीतिक वृत्तमा विवादित मुद्दा रहँदै आएको छ।
राष्ट्रपतीय चुनावको दोस्रो चरणको निर्वाचनअघि भएको चुनावी बहसमा ल पेनले मुस्लिम महिलाको पहिरनमाथिको प्रतिबन्धलाई ‘अत्यावश्यक’ बताइन्। उनले आफू राष्ट्रपति भए सार्वजनिक स्थानमा मुस्लिम पहिरिनमा प्रतिबन्ध लगाउने तथा पहिरिनेलाई जरिवाना तिराउने कानून ल्याउने बताइन।
अर्का उम्मेदवार तथा वर्तमान राष्ट्रपति इम्यानुयल म्याक्रोनले आफ्नो सम्पूर्ण ध्यान ल पेनकोजस्तो स्काफमा ‘केन्द्रित’ नरहेको बताए। उनले आफ्नो सरकारले यो समस्याको जरो पहिचान गर्न काम गरिररहेको र ‘पृथकतावादी कानून’मार्फत यसलाई सम्बोधन गरिने बताए। उनी सबै पहिरन प्रतिबन्ध गर्ने कानून ल्याउने पक्षमा नरहेको उनको भनाइ छ।
फ्रान्समा ६० लाख मुसलमान बस्छन्, जो फ्रान्सको सबैभन्दा ठूलो अल्पसंख्यक समुदाय हो। तर, यो समुदायले लगाउने पहिरन पछिल्ला केही निर्वाचनका बहसको प्रमुख विषय बन्न थालेको छ। विशेषतः बुर्का, हेडस्काफले फ्रेन्च मूल्य मान्यतालाई चुनौती दिने बताउँदै तिनको आंशिक वा पूर्ण प्रतिबन्धको माग उठ्ने गरेको छ।
दक्षिणपन्थी उम्मेदवार ल पेनले उनको घोषणापत्रमै राष्ट्रपति बनेमा सार्वजनिक स्थलमा शरीर ढाक्ने मुस्लिम पहिरनमा प्रतिबन्ध लगाउने घोषणा गरेकी छन्। यो विषयमा म्याक्रोनले आफूलाई ल पेनभन्दा उदार देखाउने प्रयास गरिरहेका छन्। तर, आलोचकहरू म्याक्रोनको सरकारले ल्याएको पृथकतावादविरोधी कानूनले मुसलमान समुदायलाई लक्षित गरेको आरोप लाग्ने गर्छ।
फ्रान्सभित्र इस्लाम धर्मावलम्बीप्रतिको घृणाविरुद्ध अभियान चलाइरहेका मरवान मुहम्मदका अनुसार म्याक्रोन र ल पेन दुईले इस्लामलाई राजनीतिक फुटबलमा बदलिएका छन्। दुई उम्मेदवार मतदाता तान्न इस्लाममाथि प्रहार गरिरहेको उनले आरोप लगाए। ल पेनको कठोर अडान ‘म्याक्रोनका लागि मुस्लिम मतदाता तान्न उपयोगी हुने’ मुहम्मदलले बताए। उनले भने, ‘ल पेनको कठोर नीतिका कारण धेरै मुस्लिमले म्याक्रोनलाई विकल्पका रूपमा हेरिरहेका छन्। तर, म्याक्रोनको गत पाँच वर्षका नीति हेर्ने हो भने तिनले मुस्लिमहरूलाई असर गरेको छ।’
फ्रान्समा सन् २००४ देखि मुस्लिम महिलाले लगाउने पहिरन प्रतिबन्धको निशानामा पर्न थालेको हो। त्यो वर्ष विद्यालय तथा कलेजका कक्षाकोठामा हेडस्काफमा प्रतिबन्ध लगाइएको थियो। त्यसपछि सन् २०१० मा सार्वजनिक स्थलमा मुस्लिम महिलाले अनुहार छोप्ने पहिरन निकाबलाई प्रतिबन्ध लगाइयो। त्यसयता फ्रेन्च मुस्लिम महिलाहरूले पहिचानजनित पहिरनका रूपमा सार्वजनिक स्थानमा हेडस्काफ लगाउँदै आएका थिए।
टीआरटी वर्ल्डबाट
