सुनसरी- प्रसिद्ध धार्मिक तीर्थस्थल बराहक्षेत्र जाने बाटो अवरुद्ध हुँदा स्थानीय बासिन्दाले रकम सङ्कलन गरी बाटो खुलाउने प्रयास गरिरहेका छन्।
लगातारको अविरल वर्षाका कारण चतरा-बराहक्षेत्र सडकखण्ड अन्तर्गत धनसार खोला, मूर्तिडाँडा, कृष्णभीर, झरझरे, १७ नम्बर लगायत अन्दाजी १ किलोमिटर मिटर जति स्थानमा पहिरो झरेर सडक भाँसिएको छ। पहिरोका कारण सडक अवरुद्ध हुँदा, बराहक्षेत्रबाट चतरा आउजाउ गर्ने विद्यार्थी, धार्मिक तीर्थयात्री तथा सर्वसाधारण नागरिकहरूलाई समस्या भएको छ।
टाढा टाढाबाट आउने धार्मिक तीर्थयात्रीको सवारी साधन बाटामै रोकिंदा अलपत्र परेको स्थानीय सन्तोष भण्डारीले बताएका छन्। यात्रुहरूको समस्यालाई मध्यनजर गर्द स्थानीयसँग आर्थिक रकम सङ्कलन गरी आजबाट अवरुद्ध सडक खुलाउन रौता कन्स्ट्रक्सनको जेसिवि प्रयोग गरी रहेको भण्डारीले बताए।
जनताबाट सङ्कलित रकमबाट तेल किनि जेसिविलाई हालिदिए अवरुद्ध सडक खुलाउने प्रयास भइरहेको भण्डारीले बताए।
परिरहेले सडक अवरुद्ध हुँदा खुलाउन समस्या भइरहेको छ। सडक डिभिजन कार्यालयको डोजर र स्काभेटर प्रयोग गरी तथा स्थानीय बासीको सहकार्यमा अवरुद्ध सडक खुलाउने काम गर्ने बराहक्षेत्र नगरपालिकाका वडा नं १ वडा अध्यक्ष किशन मगरले बताए।
विश्वका हिन्दू धर्मावलम्बीहरूको पवित्र तीर्थस्थल बराहक्षेत्रसम्म पुग्ने सडक सहज नहुँदा तीर्थ यात्रीले सास्ती बेहोर्नु परिरहेको नगर प्रमुख कार्कीले बताए। तत्काल समस्या समाधान गर्न मात्रै नगरले सक्ने नगर प्रमुख रमेश कार्कीको भनाइ छ। चतरा-बराहक्षेत्र सडकको पहिरोको समस्या दीर्घकालीन निराकरणका लागि संघीय सरकारलाई पहल गरिदिन उनले अनुरोध गरे।
बराहक्षेत्रमा नेपालका विभिन्न जिल्लासँगै भारतको बिहार, उत्तराखण्ड, सिक्किम दार्जिलिङ र भुटानबाट समेत भक्तजनहरू आउने गरेका छन्।