काठमाडौं- देवेन्द्र गौतम पत्रकारिता पुरस्कार २०८१ बाट पुरस्कृत भएका दृष्टि साप्ताहिकका सम्पादक शम्भु श्रेष्ठले आफुले प्राप्त गरेको धनराशि मृगौला पीडित सुनसरीका पत्रकार पीबी दियालीलाई दिएका छन्।
राजधानी बाहिर मोफसल (सुनसरी) मा आफ्नो कर्मभूमि बनाई पत्रकारिताको माध्यमबाट जनताको आवाज बुलन्द गर्ने पत्रकार पीबी दियाली रकमको अभाव हुँदा उपचारमा समस्या झेल्दै आएका थिए।
दियालीको नाममा इटहरीमा रहेको सानो घर जग्गा बेचेर भए पनि आफ्नो उपचारमै खर्च गर्दै आएका थिए।
पत्रकार श्रेष्ठले मृगौला पीडित भई वीर अस्पताल (नयाँ भवन कोठा नं. २६७) यूरोलोजी विभाग उपचाररत पत्रकार पीबी दियालीलाई भेटेर एक लाख रकम दिएका हुन्।
मृगौला ट्रान्सप्लान्ट पछि कोठा भाडा लिएर महाबौद्ध काठमाडौंमा बेड रेष्टमा रहेका उनलाई केही समय अघिदेखि पिसावमा संक्रमण देखिएपछि डाक्टरको सल्लाह अनुसार अस्पतालमा भर्ना भई नसाको माध्यमबाट एन्टिवाइटिक औषधि चलाई उपचारत रहेका छन्।
४६ वर्षीय पत्रकार दियालीले धरानबाट प्रकाशित हुने ब्लाष्ट दैनिकबाट पत्रकारिताको थालनी गरेका थिए। उनी द्वन्दकालीन समयमा समचार लेखेको विषयमा राज्यद्वारा सुनसरीबाट पक्राउ परी ३ महिना हिरासतमा बसेका थिए।
दियाली हाल नेपाल पत्रकार महासङ्घ कोशी प्रदेश समिति सदस्य तथा दलित विभाग संयोजक हुन्। उनी नेपाल दलित पत्रकार सङ्घ र समाजवादी प्रेस सङ्गठनको केन्द्रीय सदस्य हुन् भने सुनसरीबाट प्रकाशित गणराज्य साप्ताहिक र मकालु अनलाइनका प्रधान सम्पादक हुन्।
करेन्ट मिडिया एण्ड रिसर्च सेन्टरले वरिष्ठ पत्रकार स्वर्गीय देवेन्द्र गौतमको स्मृतिमा स्थापना गरेको १ लाख धनराशिको पत्रकारिता पुरस्कार यस वर्ष सम्भु श्रेष्ठले प्राप्त गरेका थिए। यसै अवसरमा रोटरी क्लव काठमाडौंका अध्यक्ष देश कुमार श्रेष्ठले ८२ हजार नगदसहित पत्र पदान गरेका थिए।
स्वर्गीय पत्रकार देवेन्द्र गौतमका सुपुत्र किरणले ५० हजार उपलब्ध गरेका थिए।