काठमाडौं- बाँके नरैनापुर गाउँपालिका-४ कृष्णनगर बस्ने उजागर धोबीको घरमा सोमबार दिउँसो आगलागी भई बस्तीमा फैलिदा १५ वटा घर र ८ वटा गोठ पूर्णरूपमा जलेर करिब १८ लाख रूपैयाँ बराबरको धनमाल नष्ट भएको छ ।
बारा परवानीपुर गाउँपालिका-५ बहुअरी बस्ने मोतिलाल साहको घरमा सोमबार दिउँसो आगलागी भई उनको घरसँगै रहेको शेषमान साहको घरमा आगलागी फैलिदा दुवै घर पूर्णरूपमा जलेर करिब १० लाख ७५ हजार रूपैयाँ बराबरको धनमाल नष्ट भएको छ ।
तेह्रथुम आठराई गाउँपालिका-७ थोक्लुङस्थित कर्कले भन्ने स्थानमा लोकतान्त्रिक सामुदायिक वनमा सोमबार दिउँसो लागेको आगलागी फैलिएर सोही ठाउँ बस्ने तील बहादुर बल(तामाङ)को घरमा समेत आगलागी हुँदा घर पूर्णरूपमा जलेर करिब १० लाख रूपैयाँ बराबरको धनमाल नष्ट भएको छ ।
मोरङ बिराटनगर महानगरपालिका-११ लंकाटोल बस्ने ४७ वर्षीय राजेश साहको घरमा रहेको शिव शंकर प्लाष्टिक बोरा उद्योगमा करेन्ट सर्ट भई सोमबार साँझ आगलागी हुँदा बोरा बनाउने मेसिन तथा बोरा पूर्णरुपमा जलेर करिब २ करोड रूपैयाँ बराबरको धनमाल नष्ट भएको छ । चितवन, भरतपुर महानगरपालिका-११ अमनचोकस्थित बर्दिया घर भएकी खेम कुमारी गुरुङको किराना पसलमा करेन्ट सर्ट भई गएराति आगलागी हुँदा पसल पूर्णरूपमा जलेर करिब २५ लाख रूपैयाँ बराबरको धनमाल नष्ट भएको छ ।