काठमाडौं- कास्की पोखरा महानगरपालिका-६ खहरेस्थित सडकमा बागमती प्रदेश ०२-०२९ प ०९७३ नम्बरको मोटरसाइकल आफै अनियन्त्रित भई मंगलबार बिहान दुर्घटना हुँदा मोटरसाइकल चालक डोल्पा त्रिपुरा सुन्दरी नगरपालिका-१ घर भई हाल ललितपुर बंगलामुखी बस्ने २० वर्षीय किशोर कठायतको मृत्यु भएको छ । दुर्घटनामा गम्भीर घाइते भएका उनको गण्डकी मेडिकल कलेजमा उपचारको क्रममा मृत्यु भएको हो ।
धनुषा औरही गाउँपालिका-५ चक्करस्थित सडकमा ज.७ प २४३५ नम्बरको मोटरसाइकलको ठक्करबाट पैदलयात्री सोही ठाउँ बस्ने ४० वर्षीया मानकी देवी मण्डलको सोमबार राति मृत्यु भएको छ । ठक्करबाट गम्भीर घाइते भएकी उनको प्रादेशिक अस्पताल जनकपुर हुँदै थप उपचारको लागि बिराटनगरतर्फ लैजाने क्रममा बाटोमै मृत्यु भएको हो । हाल फरार मोटरसाइकल चालकको प्रहरीले खोजी गरिरहेको छ ।
सल्यान सारदा नगरपालिका-१ दारीमचौरस्थित सडकमा भे.१ ज ३३६ नम्बरको बलेरो जिप अनियन्त्रित भई मंगलबार बिहान दुर्घटना हुँदा जिपका सहचालक सोही ठाउँ बस्ने १८ वर्षीय नारायण ओलीको मृत्यु भएको छ । दुर्घटनामा गम्भीर घाइते भएका उनको कर्णाली अस्पताल श्रीनगरमा उपचारको क्रममा मृत्यु भएको हो । जिपका चालकलाई प्रहरीले नियन्त्रणमा लिएको छ ।