संयुक्त राष्ट्रसंघका अनुसार पछिल्लो २४ घण्टामा ४० हजार युक्रेनी नागरिकले देश छाडेका छन्।
यससँगै फेब्रुअरीमा युद्ध शुरु भएयता देश छाड्ने युक्रेनीको संख्या ४२ लाख नाघेको राष्ट्रसंघले बताएको छ। राष्ट्रसंघका अनुसार शरणार्थीको यो संख्या दोस्रो विश्वयुद्धयता युरोपको सबैभन्दा ठूलो हो।
शरणार्थी हेर्ने संयुक्त राष्ट्रसंघीय उच्चायुक्तको कार्यालयअनुसार आइतबारसम्म ४१ लाख ७६ हजार ४०१ युक्रेनी नागरिकले देश छाडिसकेका छन्।
युक्रेन छाड्नेमध्ये ९० प्रतिशत महिला र बालबालिका छन्। १८ देखि ६० वर्ष उमेर समूहका पुरुषलाई भने अनिवार्य सेनामा बोलाइएकाले पुरुष शरणार्थीको संख्या न्यून देखिन्छ।
राष्ट्रसंघीय ‘इन्टरनेसनल अर्गानाइजेसन फर माइग्रेसन’का अनुसार युक्रेनमा रहेका झण्डै दुई लाख पाँच हजार ५०० गैर–युक्रेनीले पनि देश छाडेका छन्। उनीहरू पढाइ र रोजगारीका लागि युक्रेन गएका विदेशी थिए।
आईओएमका अनुसार मार्चको बीचसम्म झण्डै ६४.८ लाख युक्रेनी नागरिकहरू देशभित्रै विस्थापित भएका छन्। देशबाहिर र देशभित्र विस्थापित हुने नागरिकको संख्या जोड्दा कुल एक करोड युक्रेनी विस्थापित भएको देखिन्छ, जुन देशको जनसंख्याको झण्डै एक चौथाइ हुन आउँछ।
रुसी आक्रमणअघि युक्रेनको जनसंख्या ३.७ करोड थियो, जसमा रुसले कब्जा गरेको क्रिमिया र रुससमर्थित पृथकतावादीको नियन्त्रणमा रहेको क्षेत्रको जनसंख्या जोडिएको छैन।
शरणार्थी हेर्ने संयुक्त राष्ट्रसंघीय उच्चायुक्तको कार्यालयका अनुसार युक्रेनमाथि रुसी आक्रमणपछि देखिएको शरणार्थी संकट दोस्रो विश्वयुद्धपछि युरोपले सामना गरेको सबैभन्दा ठूलो हो।