काठमाडौं– सौर्य एयरलाइन्सको जहाज दुर्घटनामा घाइते भएका पाइलट मनीषरत्न शाक्यलाई डिस्चार्ज गर्ने तयारी गरिएको छ।
उनको स्वास्थ्यमा उल्लेख्य सुधार आएको र सामान्य हिँडडुल पनि गर्न सक्ने भएकाले डिस्चार्ज गर्ने तयारी गरिएको काठमाडौं मेडिकल कलेज तथा शिक्षण अस्पतालले जनाएको हो।
दुर्घटनाका एकमात्र जीवित पाइलट शाक्यको अनुहार, आँखा, नाक र टाउकामा चोट लागेको थियो। उनको मेरुदण्डमा समेत चोट लागेको र ढाडको देब्रेपट्टिका तीनवटा करङ भाँचिएका अस्पतालले जनाएको छ। तर, उनलाई कुनै ठूलो अप्रेसन गर्नु नपरेको अस्पतालले जनाएको छ।
उनलाई अब औषधी चलाएरै मात्र पनि ठिक हुने उपचारमा संलग्न डाक्टरले जनाएका छन्। नियमित औषधि खाएर नियमित फलोअपमा आउँदा ठीक हुने अस्पतालको भनाइ छ।
गत बुधबार त्रिभुवन विमानस्थलमा भएको विमान दुर्घटनामा १८ जनाको ज्यान गएको थियो । एकमात्र जीवित पाइलट शाक्यलाई तत्काल उद्दार गरि अस्पताल लगिएको थियो।