लोक सेवा आयोगबाट न्याय नपाएको दाबी गर्दै नेपाल प्रहरीका तीनजना डीआईजीले सर्वोच्च अदालतमा रिट निवेदन बुझाएका छन्।

रिट दायर गर्ने डीआईजीहरूमा घनश्याम अर्याल, ईश्वरबाबु कार्की र प्रकाशजंग कार्की छन्। लोक सेवाबाट उजुरीमाथिको निर्णय मागेर उनीहरूले सर्वोच्च पुगी रिट बुझाएका हुन्।

बढुवाविरुद्ध उजुरी गर्ने पहिलो निकाय लोक सेवा हो। आयोगको निर्णयमा चित्त नबुझेपछि सर्वोच्चमा रिट दायर गर्ने चलन छ।

सरकारले गृह मन्त्रालयको सिफारिसमा डीआईजीहरू वसन्तकुमार पन्त, धीरजप्रताप सिंह र रवीन्द्रबहादुर धानुकलाई बिहीबार एआईजीमा बढुवा गरेको छ। यसअघि उनीहरूको सिफारिसविरुद्ध डीआईजीत्रयले लोक सेवामा उजुर दिएका थिए। आयोगले बढुवा सिफारिसमा कैफियत नपाइएको निर्णय बुधबार दिएको थियो।