इस्लामावाद– पाकिस्तानमा ईश्वर निन्दाको आरोपमा पुनः एकजनाको हत्या भएको छ। देशको उत्तर–पश्चिमी प्रान्त खैबर पख्तुनख्वाको डेरा इस्माइल खान जिल्लामा मंगलबार विद्यार्थीले शिक्षिकाको हत्या गरेका हुन्।

पाकिस्तानको प्रमुख समाचारपत्र डनका अनुसार जिल्लाको अन्जुमाबादस्थित जामिया इस्लामिया फलाहा अल–बानातमा पढ्ने तीन विद्यार्थीले ईश्वरको निन्दा गरेको भन्दै आफ्नै शिक्षिकाको हत्या गरेका छन्।

प्रहरीका अनुसार मदर्सामा पढाउने २१ वर्षीया शिक्षिका सफुरा बिबीलाई सोही मदर्साका तीन विद्यार्थीले विभत्स हत्या गरेका हुन्। मारिएकी शिक्षिकाले सपनामा आएर ईश्वरको निन्दा गरेको आरोप लगाइएको थियो।

घटनाबारे हत्या गरिएकी शिक्षिकाका काकाले प्रहरीमा उजुरी दिएका छन्। उनका अनुसार बिहान सात बजे मदर्साको गेटमा उनकी भतिजीको घाँटी रेटी हत्या गरिएको अवसथामा शव भेटिएको थियो। घटनाबारे मदर्साका म्यानेजर फोन गरेर परिवारलाई जानकारी दिएका थिए।

प्रहरीले घटनास्थलमा शिक्षिकाको शव फेला पारेको थियो। घटनामा संलग्न तीनैजना पक्राउ परेका छन्।

पक्राउ परेका विद्यार्थीहरू १७, २१ र २४ वर्षका छन्। प्रहरीले लिएको बयानमा उनीहरूले एक परिचित १३ वर्षीया बालिकाको सपनामा धार्मिक व्यक्तित्व आएर ती शिक्षिका ईश्वर निन्दक भएको र उनको हत्या गर्न आग्रह गरेको बताएका छन्। सपनाको सन्देशअनुरूप नै आफूहरूले शिक्षिकाको हत्या गरेको उनीहरूको दाबी छ।

तर, प्रहरीले यसमा अन्य रिसइबीको कारण पनि छ कि भनेर अनुसन्धान गरिरहेको छ। घटनापछि मदरसाहरूको एक बोर्ड ‘वफाकुल मदारिस अल अरब पाकिस्तान’ले हत्याको निन्दा गर्दै यसलाई ‘दुर्भाग्यपूर्ण’ भनेको छ। बोर्डले जारी गरेको विज्ञप्तिमा घटनाको स्वतन्त्र र निष्पक्ष छानविन गरी दोषीलाई कडा कारवाही गर्न माग गरिएको छ।

पाकिस्तानमा ईश्वर निन्दाको आरोपमा बर्सेनि धेरै मानिस मारिने गरेका छन्। त्यहाँको कानूनले पनि ईश्वर निन्दकलाई मृत्युदण्डको व्यवस्था गरेको छ। ईश्वर निन्दाको आरोप लागेमा भीडले नै आरोपितको हत्या गरेका घटना धेरै भइसकेका छन्।

गत वर्ष पनि पाकिस्तानको सियालकोटमा श्रीलंकाली मूलका एक उद्योगका म्यानेजरलाई ईश्वर निन्दाको आरोपमा सार्वजनिक स्थानमा जिउँदै जलाइएको थियो। प्रियंथा कुमारा नामक ती व्यक्तिको क्याबिनमा फाटेको पोस्टर भेटिएको थियो, जसमा मोहम्मद लेखिएको थियो। यसलाई कारखानामा काम गर्ने मजदुरहरूले पैगम्बरको अपमान मान्दै उनीमाथि खनिएका थिए।