काठमाडौँ । निर्वाचन आयोगले आगामी वैशाख ३० गते हुने निर्वाचनलाई ध्यान दिँदै निर्वाचन अधिकृत तोकेको छ । आयोगले देशभर कूल ६७६ जना अधिकृत तोकेको हो ।

आयोगले निर्वाचनका लागि आज सार्वजनिक सञ्चारमाध्यममा एक सूचना जारी गर्दै देशभर निर्वाचन अधिकृतको नामावाली सार्वजनिक गरेको हो । आयोगले जिल्ला न्यायाधीश तथा नेपाल सरकारका राजपत्रांकित द्वितीय श्रेणीका अधिकृत स्तरका कर्मचारीलाई मुख्य निर्वाचन अधिकृतको जिम्मेवारी दिएको हो ।

उनीहरूलाई आगामी २९ चैतदेखि जिम्मेवारी लागू हुने छ । ‘निर्वाचन अधिकृतमा नियुक्त कर्मचारीको कार्यरत कार्यालयको ठेगना सरुवा वा अन्य कुनै कारणले फरक परेको भए हाल कार्यरत कार्यलयले नै व्योहोरा अवगत गरी खटाई पठाइदिन’समेत आयोगले निर्देशन दिएको छ ।

नियुक्त भएका मुख्य निर्वाचन अधिकृत र निर्वाचन अधिकृतलाई निर्वाचन व्यवस्थापन अभिमुखीकरण तालिमका लागि आगामी ३० गते विराटनगर, धुलिखेल, पोखरा, नेपालगञ्ज तथा २ वैशाखमा जनकपुर, हेटौँडा, वुटवल र धनगढीमा तालिमको व्यवस्था गरिएको आयोगले जनाएको छ ।