मस्को- रुसी राष्ट्रपति कार्यालयका प्रवक्ता दिमित्री पेस्कोभले एक अन्तरवार्तामा रुसले आफ्नो अस्तित्व खतरामा परे मात्र आणविक हतियार प्रयोग गर्ने बताएका छन्।

पेस्कोभले सीएनएनसँगको अन्तरवार्तामा यस्तो टिप्पणी गरेका हुन्। अन्तरवार्ताकार क्रिश्चियन आमनपुरले पेस्कोभसँग युक्रेनको सन्दर्भमा राष्ट्रपति भ्लादिमिर पुटिनले आणविक हतियार प्रयोग नगर्नेमा ‘विश्वस्त’ हुनुहुन्छ भन्ने प्रश्नको जवाफ दिन जोड दिएकी थिइन्। जवाफमा पेस्कोभले त्यस्तो जवाफ दिएका थिए।

‘यदि हाम्रो देशको अस्तित्वमा खतरा उत्पन्न भयो भने आणविक हतियार प्रयोग गर्न पछि पर्दैनौं। यसमा हामी घरेलु प्रतिरक्षाको हाम्रो अवधारणालाई अनुसरण गर्नेछौं,’ पेस्कोभले बताए।

पुटिने गत महिना देशको आणविक फौजलाई उच्च सतर्क अवस्थामा रहन आदेश दिएका थिए। पुटिनको आदेशअनुरुप नै रुसी विदेश मन्त्रालयले २८ फेब्रुअरीमा रुसको आणविक मिसाइल फौजलगायत उत्तरी तथा प्रशान्तीय फौजलाई उच्च तयारीको स्थितिमा राखिएको बताएको थियो।

संयुक्त राष्ट्र संघका महासचिव एन्टोनियो गुटेरसले १४ मार्चमा ‘कुनै बेला अकल्पनीय आणविक द्वन्द्व अहिले यथार्थमा बदलिन सक्ने सम्भावनामा’ रूपान्तरण भएको बताए।

अमेरिकी राष्ट्रपति जो बाइडेनले पुटिनले रसायनिक र जैविक हतियार प्रयोगबारे सोचविचार गरिरहेको चेतावनी दिइरहँदा रुसी अधिकारीको यस्तो टिप्पणी आएको छ।

पेस्कोभले सीएनएनसँगको अन्तरवार्तामा युक्रेनमा जारी रुसी युद्ध ‘पूर्व निर्धारित योजना र उद्देश्य अनुरुप’ नै अघि बढिरहेको पनि बताए।

गत साता रुसले युक्रेनमाथि किन्जल हाइपरसोनिक मिसाइल प्रहार गरेको जानकारी दिएको थियो। डिसेम्बरमा पुटिनले सो मिसाइलको तीव्रता, उडान र उचाइले यसलाई पछ्याउन र पहिल्याउन कठिन हुने बताएका थिए।

पुटिनका अनुसार किन्जल मिसाइलले पृथ्वीको जुनसुकै भागमा एक घण्टाभित्र निशाना साँध्न सक्छ । उसले सन् २०१६ मा सिरियाली सैन्य अभियानमा प्रयोग गरेको थियो।

युक्रेन युद्धले शीतयुद्धको अन्त्यपछि विश्वमा कायम सुरक्षा संयन्त्रलाई हल्लाइदिएको छ । साथमा विश्वभर प्रमुख अन्नबालीको आपूर्ति अवरुद्ध छ भने यसले आणविक दुर्घटना निम्त्याउन सक्ने चिन्ता बढाएको छ।

अल जजिराबाट