काठमाडौँ । विदेशबाट फर्किएर तनहुँका एक युवकले होलेस्टेन र जर्सी जातका उन्नत गाई पालेर दूध बिक्री गरेका छन्। वैदेशिक रोजगारीको सिलसिलामा मलेसिया गएका व्यासनगरपालिका ११ सेरा निवासी रमेशप्रसाद आचार्य स्वदेश फर्किएर गाई पालनमा लागेका हुन्।
स्नातक पास गरेका उनी जागिरभन्दा आफ्नै स्वतन्त्र पेसा राम्रो लागेर गाई पालनमा लागेको बताउँछन्। तीन वर्षको मलेसिया बसाइँमा सन्तोषजनक कमाई भए पनि स्वदेशमै बसेर केही गरौँ भन्ने मनसायले फर्किएर गाई पालन व्यवसाय थालेको आचार्यको भनाई छ।
सुरुमा एक दुईवटा गाईबाट व्यवसाय सुरु गरेका उनले थप्दै गएर अहिले सातवटा गाई बनाएका छन्। अझै, केही गाई थप्ने योजनामा छन् उनी। दैनिक एक सय साठी लिटर दूध उपभोक्ताको घरघरमा पुगेर बिक्री गर्दै आएको उनले बताए। आचार्यले भने, ‘एक सय लिटर अन्यत्र कृषकबाट र साठी लिटर आफ्नो फार्मबाट उत्पादित दूध बिक्री गर्दै आएको छु।’
आफ्नो बारीको घाँसले मात्रै नपुगेपछि जग्गा भाडामा लिएर वार्षिक तीस हजार बुझाउँदै आएका उन सबै लागत खर्च कटाएर मासिक कम्तीमा पचास हजार कमाउँदै आएको र अन्य कुनै निकायबाट अनुदान नपाएको बताउँछन्।
तीन रोपनी जमिनमा मौसमअनुसार तरकारी खेती गरेर राम्रो कमाई पनि गर्दै आएका आचार्यले अनेक प्रकारका तरकारी खेतीबाट राम्रो कमाई भइरहको बताए।