काठमाडौँ । स्थानीय तहको निर्वाचन सम्पन्न गर्न अछाममा एक हजार २३१ म्यादी प्रहरी भर्ना लिने भएको छ। आगामी वैशाख ३० गते हुने निवार्चनका लागि अछाममा एक हजार २३१ म्यादी प्रहरी भर्ना लिइने जिल्ला प्रहरी कार्यालयले जनाएको छ।

कूल ४० दिनका लागि म्यादी प्रहरी भर्ना गर्ने भएको हो। यसका लागि तलब सुविधा पनि सोहीअनुसार उपलब्ध हुने बताइएको छ। म्यादीलाई प्रहरी जवानसरह करिब २४ हजार तलब, पोसाक भत्ता पाँच हजार र खाजा खर्च उपलब्ध गराउने व्यवस्थासमेत गरिएको छ। एक हप्तादेखि १० दिनसम्म तालिम गराइने पनि बताइएको छ।

उमेरको हकमा १८ वर्ष पूरा भई ५४ वर्ष ननाघेका व्यक्तिले ११ चैतसम्म आवेदन दिन सक्ने जिल्ला प्रहरी कार्यालय अछामले जनाएको छ।