काठमाडौं- एउटा निर्माणाधीन घरमाथि असिना बर्षिएको भिडियो फेसबुक, एक्स, युट्युब लगायतका सामाजिक सञ्जालमा फैलिएको छ। उक्त पोष्टमा भिडियोको दृश्य नेपालको विराटनगरमा परेको असिना भन्ने दावी गरिएको छ। तर हामीले गरेको तथ्य जाँचमा सो भिडियो चीनको दक्षिणमा रहेको ग्वाङ्सीमा गत बैसाखमा परेको असिनाको भिडियो भएको फेला परेको छ।

सो छोटो भिडियो क्लिप नेपाल लगायत भारत र पाकिस्तानमा हालै परेको असिनाको भिडियो भन्दै सामाजिक सञ्जालमा फैलाइएको छ।चिया खबर नामक फेसबुक पेजले “विराटनगरमा परेको असिना पानी। यत्रो असिना देख्नुभएको थियो त ?” भन्दै सेयर गरेको ३३ सेकेण्डको भिडियोमा २६ हजार लाइक गरिएको छ भने ४ हजारभन्दा बढी सेयर गरिएको छ। सोही भिडियो फागुन १२ गते एक्समा @SGNepal नामक प्रयोगकर्ताले “यो विराटनगरमा परेको असिना हो” भन्दै सेयर गरेका छन्।

धिमाल इन्टरटेनमेन्टलगायत फेसबुक पेज र युट्युब च्यानलले पनि सोही भिडियो विराटनगरमा परेको असिनाको भन्दै सेयर गरेका छन्।

के हो त यस भिडियोको वास्तविकता ?

हामीले उक्त भिडियोको स्क्रिनसट गुगल लेन्समा अपलोड गर्‍यौं। तर त्यसमा उक्त भिडियो नेपाल र भारतमा परेको असिनाको भन्दै सेयर गरेको पाइयो।

सत्यापनका क्रममा हामीले भिडियोमा उक्त भिडियोलाई इनभिड नामक टुल प्रयोग गरी कि फ्रेममा ढाल्यौ। त्यस क्रममा सोही भिडियो @rainmaker1973 नामक एक्स अकाउन्टले दक्षिण चीनको ग्वाङ्सीमा गत बैसाख १५ गते परेको असिनाको भिडियो भनी सेयर गरेको पाइयो।

त्यसैगरी सोही भिडियो @yangyubin1998 नामक एक्स अकाउन्टले दक्षिण चीनको ग्वाङ्सीमा दुई दिन परेको असिनाको भिडियो भनी गत १५ वैशाखमै सेयर गरेको फेला परेको छ।

यसबारेमा थप खोज्दा सो घटनाबारे समाचार प्रकाशित भएको फेला परेन। तर, घटना भएको भनिएको केही दिनअघि ग्वाङ्सीमा असिनापानी परेको द गार्डियनको एक समाचारमा उल्लेख गरिएको थियो।

तसर्थ, नेपालको विराटनगरमा परेको असिनाको भिडियो भन्ने दाबी गरिएको सामग्री भ्रामक छ।

(यो सामग्री नेपालचेक डट ओआरजीले तयार पारेको हो)