काठमाडौँ- महिला, बालबालिका तथा ज्येष्ठ नागरिकमन्त्री भगवती चौधरीले आध्यात्मिक ज्ञानबाट प्रशिक्षित व्यक्तिले समाज र राष्ट्रलाई सकारात्मक दिशा दिने बताउनुभएको छ । ब्रह्मकुमारी राजयोग सेवा केन्द्र काठमाडौँले आज यहाँ आयोजना गरेको ‘स्वच्छ र स्वस्थ समाजका लागि आध्यात्मिक सशक्तीकरण’ राष्ट्रिय शुभारम्भ कार्यक्रमलाई सम्बोधन गर्दै उहाँले आध्यात्मिक ज्ञानबाट प्रशिक्षित कुनै पनि व्यक्तिले हानी नोक्सानी नगर्ने उल्लेख गर्नुभयो ।
“यदी आध्यात्मिक ज्ञानबाट प्रशिक्षित राजनीतिज्ञ भएमा उहाँले गर्ने काम कारबाहीहरू र उहाँले लिने कामको रणनीतिहरू अलिकति समाजलाई सकारात्मक दृष्टिकोणले उत्थान, विकास गर्ने गरी अगाडि बढ्छ’, मन्त्री चौधरीले भन्नुभयो, ‘हामी आफैबिचमा पनि अन्तरद्वन्द्व छ । व्यक्ति–व्यक्तिबीचको, समुदायबीचको अन्तरद्वन्द्व छ । त्यसकारण मान्छेले नै व्यवहारिक प्रयोग तथा आविष्कारका लागि उत्पादन गरेका छौँ । मान्छेले नै पत्ता लगाएका, आविष्कार गरेका चिजलाई चलाउन नजान्दा, नकारात्मक कुरामा प्रयोग गर्दा संसार खराब अवस्थामा पुगेको छ ।”
एकले अर्कालाई कसरी पछाडि पारेर आफू अगाडि जाने भन्ने गलत प्रतिस्पर्धाका कारण समाज केही रूपमा गलत दिशातर्फ गएको हो कि भन्ने लागे पनि ती गलत मान्यता र अभ्यासलाई यस्ता कार्यक्रमका माध्यमबाट चिर्न सकिने मन्त्री चौधरीको भनाइ थियो । उहाँले भन्नुभयो, “अहिलेको समाजलाई पनि दृष्टिगत गरेर हेर्दा एकले अर्कालाई पछाडि पारेर कसरी अगाडि बढ्ने भन्ने प्रतिस्पर्धाको कारण समाजमा दुराभाव र दूषित विचार छन् ।”
मन्त्री चौधरीले समाजमा रहने हरेक व्यक्तिको विचारमा थोरै भए पनि आध्यात्मिक चेतना आउनैपर्ने बताउनुभयो । “राजनीतिक क्षेत्र, व्यावसायिक क्षेत्र तथा अन्य औद्योगिक क्षेत्रमा, अथवा कृषि तथा जुनसुकै क्षेत्रमा पनि समाजमा रहने हरेक व्यक्तिको विचारमा अलिकति आध्यात्मिक चेतना आउनै पर्छ”, उहाँले भन्नुभयो– “आध्यात्मिक कुराबारे जानकार व्यक्ति, आध्यात्मिक ज्ञान लिएको व्यक्तिले आफ्नो समाजलाई नकारात्मक दिशातर्फ दो¥याउँदैन । उसले आफ्नै साथी सर्कल, आफन्त, समाज कसैलाई पनि घात गर्दैन ।”
आध्यात्मिक सेवा केन्द्र, प्रशिक्षण केन्द्र, आध्यात्मिक मन्दिर, गुम्बा जस्ता धार्मिक सेवा केन्द्र असल व्यवहार, सकारात्मक व्यवहारको कुरा ल्याउने काममा तत्पर रहेको उल्लेख गर्दै मन्त्री चौधरीले त्यसलाई सबैले निरन्तरता दिनुपर्ने बताउनुभयो । “हत्या, हिंसा गरोस्, अरूको वितण्डा गरेर आफू माथि उठ्ने भन्ने कुरा धर्मले कहिल्यै पनि गर्दैन’, उहाँले भन्नुभयो, “हरेक धर्मले सुविचारहरू फैलाउँछ । स्वस्थ विचारहरू फैलाउँछ । सकारात्मक कार्यहरू गर्न प्रेरित गर्छ ।”
ओम शान्तिको अभियान नेपालको मात्र नभएर विश्वभरको खाँचो रहेको उहाँको भनाइ थियो । यसबाट समुदायलाई सकारात्मक कुराको प्रोत्साहन गर्दै गलत अभ्यास र मान्यता न्यूनीकरण गर्न मद्दत पुग्ने उहाँले बताउनुभयो ।
ब्रह्मकुमारी राजयोग सेवा केन्द्र नेपालका राष्ट्रिय निर्देशक राज दादी माँको अध्यक्षतामा उक्त कार्यक्रम भएको हो ।