विराटनगर– कोशी प्रदेशमा एमालेको सरकार बनाउन पहल शुरू भएको छ। एमाले र माओवादीले मुख्यमन्त्री केदार कार्कीलाई दिएको समर्थन फिर्ता लिएसँगै एमाले कोशी संसदीय दलका नेता हिक्मतकुमार कार्कीलाई मुख्यमन्त्री दाबी प्रस्तुत गरिएको हो।

प्रदेश प्रमुखले नयाँ सरकार गठनका लागि औपचारिक आव्हान नगर्दै गठबन्धनले सरकारमा दाबी प्रस्तुत गरेको हो। कार्कीलाई मुख्यमन्त्री बनाउन बहुमत सांसदको हस्ताक्षरसहित प्रदेश प्रमुख परशुराम खापुङ्गसमक्ष दाबी प्रस्तुत गरेका हुन्।

माओवादी र एमालेले समर्थन फिर्ता लिएसँगै केदार कार्कीको सरकार अल्पमतमा परेको छ।

कोशीमा सरकार गठनका लागि बहुमत पुर्‍याउन ४७ सांसद चाहिन्छ। हिक्मतकुमार कार्कीको पक्षमा एमालेका ४० र माओवादीका १३ गरि ५३ सांसदले हस्ताक्षर गरेका छन्।