राष्ट्रिय ध्वजावाहक नेपाल वायुसेवा निगमले झन्डै दुई वर्षको अन्तरालपछि भारतको मुम्बई र बैंगलोरमा पुनः उडान सञ्चालन गर्ने भएको छ।
कोभिड-१९ महामारीका कारण स्थगित भएको उडान पुनः सञ्चालन गर्न लागिएको निगमले जनाएको छ। निगमका प्रवक्ता अर्चना खड्काका अनुसार आगामी १३ चैतदेखि मुम्बईमा नियमित उडान पुनः सञ्चालन गर्न लागिएको छ। यो गन्तव्यमा साताको तीन उडान हुनेछन्। काठमाडौँ-मुम्बई रुटमा बुधबार, शुक्रबार र आइतबार उडान हुनेछन्।
त्यसैगरी निगमले भारतकै बैंगलोरमा पनि १५ चैतदेखि पुनः उडान सञ्चालन गर्ने निगमका प्रवक्ता खड्काले बताइन्। उनका अनुसार यो गन्तव्यमा पनि सातामा तीन उडान सञ्चालन हुनेछन्। मङ्गलबार, बिहीबार र शनिबार उडान सञ्चालन गरिनेछ।
कोरोना महामारी नियन्त्रणका लागि सरकारले लागू गरेको लकडाउनका कारण ०७६ चैतदेखि स्थगित उडान फेरि शुरु हुने भएका हुन्। सन् २०२० मार्च २१ देखि भारतको बैंगलोरमा निगमको उडान हुन सकेको थिएन।
निगमको अन्तर्राष्ट्रिय गन्तव्यमध्ये भारतका नयाँदिल्ली, मुम्बई र बैंगलोर महत्वपूर्ण मानिन्छन्। निगमले नयाँदिल्लीमा भने महामारीताका र अहिले पनि नियमित उडान सञ्चालन गरिरहेको छ। एयरबबल सम्झौताअनुरुप सीमित सङ्ख्यामा उडान भइरहेको भारतका दिल्ली र छिट्टै सञ्चालनमा आउन लागेका थप दुई गन्तव्य मुम्बई र बैंगलोरमा पूर्ण क्षमता अर्थात पहिलाको उडान जसरी सञ्चालन गर्ने निगमको योजना छ। भारतका तीनवटै गन्तव्यमा अब पूर्ववत क्षमतामै उडान सञ्चालन हुने निगमले उल्लेख गरेको छ।
निगमले काठमाडौँ-दिल्ली दैनिक दुई उडान गर्ने भएको छ। ३० फागुनदेखि उक्त गन्तव्यमा दैनिक दुई उडान सञ्चालन गरिने निगमले जनाएको छ। भारतले आफ्ना सबै प्रकारका व्यावसायिक उडान खुला गरेसँगै निगमले दिल्लीका लागि दैनिक दुई उडान गर्ने भएको हो। अहिले भारतबाट एयर इण्डिया, इण्डिगो एयर र भिस्तारा एयरले काठमाडौँ गन्तव्यका लागि नियमित उडान गरिरहेका छन्।