पर्वत– पर्वतको जलजला गाउँपालिका २ मल्लाजको दहमा एक दम्पतीको आफ्नै घरमा सुतिरहेको अवस्थामा हत्या भएको छ।
स्थानीय ६९ वर्षीय सूर्यबहादुर जिसी र उनकी श्रीमती अन्दाजी ६७ वर्षीया कमला जिसी आफ्नै घरभित्र मृतावस्थामा भेटिएका हुन्। स्थानीयले श्रीमान-श्रीमती नै मृतावस्थामा देखेपछि जिल्ला प्रहरी कार्यालय पर्वतमा खबर गरेका थिए।
स्थानीयको खबर लगत्तै जिल्ला प्रहरी कार्यालय पर्वतवाट गएको टोलीले घटनाको अनुसन्धान गरिरहेको जिल्ला प्रहरी कार्यालय पर्वतका प्रमुख प्रहरी नायब उपरीक्षक खुमलाल भुसालले बताए
“घटनाको प्रारम्भिक अवस्था हेर्दा शङ्कास्पद देखिएको छ”, उनले भने, “पोखराबाट चिकित्सकसहितको टोली बोलाएर थप अनुसन्धानपछि मात्र घटनामा यकिन विवरण आउनेछ।”
जलजला गाउँपालिका-२ का वडाअध्यक्ष प्रकाश जिसीले घरभित्रै हत्या भएको जस्तो प्रकृतिमा दम्पतीको शव बिहान ९ बजे भेटिएकोे जानकारी दिए। दुवै जना रगताम्य अवस्थामा भेटिएका थिए।
अज्ञात समुहले लुटपाटका लागि हत्या गरेको हुनसक्ने प्रहरी आकलन छ। घरको स्थिति हेर्दा लुटपाट पनि भएको हुनसक्ने देखिएको प्रहरीले जनाएको छ। घरभित्र दम्पती मृत फेला परेका थिए भने घरको ढोकामा भने ताल्चा लगाइएको प्रहरीले जनाएको छ।
घरमा जिसी दम्पती मात्रै बस्दै आएका स्थानीयवासीले बताएका छन्। दम्पतीका २ छोरा वैदेशिक रोजगारीका लागि कोरिया गएका र एक छोरा म्याग्दीको बेनीबजारमा बस्दै आएका छन्।
घटनास्थलमा प्रहरीको अनुसन्धान टोली पुगिसकेको र अनुसन्धान शुरू गरेको प्रहरीले जनाएको छ।