कैलाली– सुदूरपश्चिम प्रदेशको कञ्चनपुर जिल्लामा पर्ने पुनर्वास नगरपालिका वडा नं ४ स्थित आनन्द बजार निवासी गोविन्द गौतमले देशको सीमा रक्षाका लागि प्राण उत्सर्ग गरेको आज ७ वर्ष पूरा भएको छ।
सात वर्षअघि आजकै दिन अर्थात् २०७३ फागुन २६ गते स्थानीय कारगिल डाँडा नजिकै कल्भर्ट निर्माणका क्रममा भएको विवादपछि भारतीय सीमा सुरक्षा बल ‘एसएसबी’को गोली लागेर उनको मृत्यु भएको थियो।
सात वर्षको यो अवधिमा सो क्षेत्रको सीमा विवाद त समाधान भएन नै, गौतमको परिवार पनि छिन्नभिन्न भएको छ। सरकारले गोविन्द गौतमलाई सहिद घोषणा गरे पनि उनको बलिदान, आफ्नो भूभाग रक्षार्थ सो क्षेत्रका बासिन्दाले गर्दै आएको संघर्ष र उनीहरुको चिन्ताबारे राज्यका तर्फबाट खासै चासो राखेको पाइँदैन।
के थियो सीमा विवाद?
भारतसँग सीमा जोडिएकाले त्यस क्षेत्रका बासिन्दा सरसामान खरिदका लागि भारतीय बजार बसईमा निर्भर हुनु स्वाभाविक थियो। स्थानीयवासी भारतको बसई हुँदै सम्पुर्णनगरबाट आवश्यक सामान खरिद गरी ल्याउने गर्छन्।
वर्षाको समयमा डुबान हुने भएकाले दुवै देशका अधिकारी बसेर भारततिर आवतजावत गर्न सहज हुनेगरी कल्भर्ट निर्माण गर्ने सहमति गरे।
सोही अनुरुप पुनर्वास नगरपालिकाले कल्भर्ट निर्माणका लागि बजेट विनियोजन समेत गरी काम सुरु गरेको थियो। सोही अनुरुप त्यहाँ होमपाईप बिछ्याइन्छ र त्यसलाई ढाक्नका लागि बालुवामाथि ईटा राख्न थाल्नासाथ भारतीय एसएसबीले हस्तक्षेप गरी विवाद सुरु गर्छन।
विवादले उग्र रुप लिएपछि गोविन्द पनि साइकल लिएर घरबाट निस्किए। स्थानीयवासी र एसएसबीबीच झडपको अवस्था सिर्जना भएपछि एसएसबीले चलाएको गोली लागेर गोविन्द ढले र सहादत प्राप्त गरे।
