मनिष अर्याल
काठमाडौं टुँडिखेलमा नेपाली सेना दिवस र शिवरात्रिको धुमधाम छ। हरेक वर्ष शिवरात्रिका दिन टुँडिखेलमा सेना दिवस आयोजना गर्ने गरिन्छ।
यस वर्ष १७ फागुन मंगलबार शिवरात्रि परेको छ। सोही दिन सेना दिवस पनि मनाउने गरिन्छ। टुँडिखेलमा आयोजना हुने सेना दिवसमा राष्ट्रपति तथा नेपाली सेनाका परमाधिपति विद्यादेवी भण्डारीको प्रमुख आतिथ्यमा सैनिक मञ्चमा विशेष कार्यक्रम आयोजना गरिन्छ। त्यस अवसरमा राष्ट्रपति भण्डारीले सैनिक मञ्चस्थित वीर स्मारकमा माल्यार्पण गर्न चलन छ। र, सेनाले राष्ट्रपतिको सम्मानमा सम्मान गारत अर्पण गर्छ।
कार्यक्रममा सेनाको हेलिकप्टरद्वारा ‘महाशिवरात्री तथा सेना दिवस’ अंकित ब्यानर प्रदर्शन र पुष्पबृष्टी गर्छन्। त्यसपछि षट्कोण फर्मेसन तथा राष्ट्रिय झण्डाको आकृतिसमेत निर्माण गरी राइफल र तोपबाट महाशिवरात्री बढाइँ गरिन्छ।
हेलिकप्टरमार्फत उद्धारसम्बन्धी विशेष कला प्रदर्शन, मार्च पास्ट, खुकुरी नृत्य, आइकिडो, कराँते खेल, विकास निर्माण, नेपाली सैनिक ब्यान्ड, विपद् व्यवस्थापन तथा प्रकृति संरक्षणसम्बन्धी विभिन्न हातहतियार, भेहिकल र उपकरणहरूको प्रदर्शन, विशेष फौज बाहिनीबाट फ्रि–फल जम्पलगायत विभिन्न प्रदेशका संस्कृति झल्किने नाच र गतिविधि प्रदर्शन गरिन्छ।
