काठमाडौं- कैलालीको धनगढीमा जारी लिटल फ्लावर प्रिमियर लिग (एलपीएल)को मंगलबार सम्पन्न दुई खेलमा शुक्लाफाँटा ब्ल्याकबक्स फाउन्डेसन र धनगढी क्रिकेट एकेडेमी विजयी भएका छन्।
शुक्लाफाँटाले कैलाली जिल्ला क्रिकेट क्लब र धनगढीले शारदा सेकेन्डरी स्कुललाई पराजित गरे।
आज सम्पन्न पहिलो खेलमा शुक्लाफाँटाले कैलालीलाई ९० रनले पराजित गर्यो। समूह चरणमा सबै ३ खेल खेल्दा २ जित र १ हार बेहोरेको शुक्लाफाँटाले समूह ’ए’ बाट सेमीफाइनल सम्भावना जीवितै राखेको छ। दुवै खेल जितेको धनगढी स्पोर्ट्स क्लब अन्तिम खेलमा खप्तड इन्डोरसँग पराजित भएको खण्डमा शुक्लाफाँटा र धनगढीमध्ये नेट रन रेटमा अघि हुने टिम सेमीफाइनल पुग्नेछ।
शुक्लाफाँटाले दिएको १८४ रनको लक्ष्य पछ्याएको कैलालीले १८.४ ओभरमा ९३ रन बनाउँदा सबै विकेट गुमायो।
कैलालीका नरेन साउदले १७ रन बनाउनुबाहेक अन्य ब्याटरले दोहोरो अंकमा रन बनाउन सकेनन्। शुक्लाफाँटाको बलिङमा बसन्त खत्री, भारत चन्द र निरञ्जन गौतमले २-२ विकेट तथा भारत चन्द, कैलाश ऐर, सुशील रावल र विकास ऐरले १-१ विकेट लिए।
यसअघि टस जितेर ब्याटिङ गरेको शुक्लाफाँटाले २० ओभरमा ५ विकेट गुमाएर १८३ रन बनायो।
शुक्लाफाँटाका लागि दुई ब्याटरले अर्धशतकीय योगदान दिए। प्लेयर अफ द म्याच घोषित किरण ठगुन्नाले सर्वाधिक ७० रन बनाए, जुन क्रममा ४२ बलमा १० चौका र १ छक्का प्रहार गरे। यस्तै, विशाल ऐरले ४३ बलमा ६ चौका र २ छक्का मद्दतले ५४ रन बनाए। लोकेश जोशीले ३७ रन बनाए।
कैलालीका लागि बिनोद बोहराले ३ विकेट तथा धर्मराज जोशीले २ विकेट लिए।
आजको दोस्रो खेलमा धनगढी क्रिकेट एकेडेमीले शारदा सेकेन्डरी स्कुललाई ८१ रनले पराजित गर्यो। १७१ रनको लक्ष्य पछ्याउने क्रममा शारदाले १५.५ ओभरमा ८९ रन मात्र बनायो। धनगढी र शारदा दुवै टिम सेमीफाइनल रेसबाट बाहिर भइसकेका छन्।
लक्ष्य पछ्याउने क्रममा शारदाका अभिषेक मल्लले ४१ तथा जीवन चन्दले ११ रन बनाउनुबाहेक अन्य ब्याटरले दोहोरो अंकमा रन बनाउन सकेनन्।
प्लेयर अफ द म्याच घोषित धनगढी क्रिकेट एकेडेमीका लेग स्पिनर युवराज खत्रीले ४ विकेट लिए, जुन क्रममा ३.५ ओभरमा १६ रन खर्चिए। विजय रानाले २ तथा हिक्मत महरा, मान साउद र निरज ऐरले १-१ विकेट लिए।
यसअघि टस जितेर ब्याटिङ गरेको धनगढीले २० ओभरमा ७ विकेट गुमाएर १७० रन बनायो।
धनगढीको ब्याटिङमा मान साउदले सर्वाधिक ३७ रन बनाए। यस्तै, सचिन साउदले ३५, युवराज खत्रीले २९ तथा विजय रानाले २३ रन बनाए। ११५ रनमा ७ विकेट गुमेको अवस्थामा मान र युवराजले अविजित ५५ रनको साझेदारी गरे।
प्रतियोगिताअन्तर्गत बुधबार पनि दुई खेल हुनेछन्। पहिलो खेल बिहान ९ बजे क्रिकेट एक्सिलेन्स सेन्टर र जेएस स्पोर्ट्स-११ सुपर स्टार्सबीच तथा दोस्रो खेल दिउँसो १ बजे शारदा सेकेन्डरी स्कुल र कैलाली मल्टिपल क्याम्पसबीच हुनेछन्।
प्रतियोगिताको सेमीफाइनल पुग्ने ३ टिमको टुंगो लागिसकेको छ। समूह ‘बि’बाट युथ अफ टीकापुर, समूह ‘सी’बाट घोडाघोडी क्रिकेट एकेडेमी र समूह ‘डी’बाट सत्यवती एकेडेमी सेमीफाइनल प्रवेश गरिसकेका छन्।
लिटल फ्लावर स्पोर्टस् क्लबको आयोजनामा शुरु भएको प्रतियोगिताको यो आठौं संस्करण हो। प्रतियोगिताको उपाधि विजेताले दुई लाख ५५ हजार र उपविजेताले एक लाख २८ हजार रुपैयाँ पुरस्कार पाउने छन्। प्रतियोगितामा काठमाडौं, रौतहट, दाङ, कैलाली र कञ्चनपुरका गरी १६ वटा टिमको सहभागिता रहेको छ।