काठमाडौं- कैलालीको धनगढीमा जारी लिटल फ्लावर प्रिमियर लिग (एलपीएल) को आठौँ संस्करणअन्तर्गत सातौँ दिन सम्पन्न दुई खेलमा युथ अफ टीकापुर र गरुडा नगरपालिका विजयी भएका छन्। समूह ‘बी’बाट युथ अफ टीकापुरले सेमीफाइनलमा स्थानसमेत पक्का गरेको छ।
आज सम्पन्न पहिलो खेलमा युथ अफ टीकापुरले कैलाली मल्टिपल क्याम्पसलाई पराजित गर्दै समूह चरणमा तीनवटै जितको साथ सेमीफाइनलमा स्थान सुरक्षित गरेको हो।
टीकापुरले दिएको ९५ रनको लक्ष्य पछ्याउने क्रममा निर्धारित ११ ओभरमा कैलालीले ७ विकेट गुमाएर ७९ रन मात्र बनाउन सक्यो। कैलालीको ब्याटिङमा कप्तान दीपक कँडेलले सर्वाधिक ३८ र पारस रोकायाले १२ रनको योगदान दिए। टीकापुरका सुमित महर्जनले २ विकेट लिँदा मोहम्मद हुसेन, हरि चौहान, गौतम केसी र प्रकाश जैसीले १–१ विकेट लिए।
खराब मौसमका कारण ११ ओभरमा घटाइएको खेलमा टस जितेर ब्याटिङ गर्दै टीकापुरले ७ विकेट गुमाएर ९४ रन बनायो।
टीकापुरका लागि प्लेयर अफ द म्याच घोषित गौतम केसी तथा प्रकाश जैसीले समान ३४ रनको योगदान दिए। केसीले २७ बलमा १ चौका र ३ छक्का तथा जैसीले २२ बलमा ३ चौका र १ छक्का प्रहार गरे। ३८ रनमा ४ विकेट गुमेको अवस्थामा केसी र जैसीले छैटौं विकेटका लागि ५५ रनको साझेदारी गरे।
कैलालीको बलिङमा अभिषेक कुँवर र सुशील बिष्टले २–२ तथा लोकेन्द्र खनाल र पारस रोकायाले १–१ विकेट लिए।
यस्तै, आजको दोस्रो खेलमा गरुडा नगरपालिकाले विजयी शुरुवात गर्ने क्रममा सुदूरपश्चिमाञ्चल एकेडेमीलाई ९८ रनले पराजित गरेको छ। गरुडाले दिएको १७४ रनको लक्ष्य पछ्याएको सुदूरपश्चिमाञ्चल एकेडेमीले २० ओभर ब्याटिङ गरे पनि ८ विकेट गुमाएर ७५ रन मात्र बनायो।
सुदूरपश्चिमाञ्चल एकेडेमीको लागि निशान रेग्मीले १८ तथा सौर्य श्रेष्ठले १४ रन बनाए। गरुडाका बलर धर्मेन्द्र साहले ४ विकेट लिए, जुन क्रममा उनले ४ ओभरमा १२ रन मात्र खर्चिए। नरेश शाह, रुपेश सिंह र नितेश यादवले १–१ विकेट लिए।
टस जितेर ब्याटिङ गरेको गरुडाले २० ओभरमा ८ विकेट गुमाएर १७३ रन बनायो। गरुडाका लागि रुपेश सिंहले आक्रामक ब्याटिङ गर्दै ६० रन योगदान दिए, जुन क्रममा उनले २९ बलमा ५ चौका र ५ छक्का प्रहार गरे। निश्चल बिक्रमले अविजित ४३ रन बनाए, जुन क्रममा २३ बलमा ४ चौका र ३ छक्का प्रहार गरे। ७६ रनमा ६ विकेट गुमेको अवस्थामा रुपेश र निश्चलले ७४ रनको साझेदारी गरे।
सुदूरपश्चिमाञ्चलको बलिङमा पारस सुनार र सन्दीप बिष्टले २–२ विकेट लिए। प्रकाश जोशी, वीरेन्द्र चन्द, सौर्य श्रेष्ठ र सागर साउदले १–१ विकेट लिए।
प्रतियोगिताअन्तर्गत भोलि पनि दुई खेल हुनेछन्। पहिलो खेल बिहान ९ बजे घोडाघोडी क्रिकेट एकेडेमी र गरुडा नगरपालिकाबीच तथा दोस्रो खेल दिउँसो १ बजे सत्यवती एकेडेमी र लिटल एन्जल्सबीच हुनेछ।
लिटल फ्लावर स्पोर्टस् क्लबको आयोजनामा शुरु भएको प्रतियोगिताको यो आठौँ संस्करण हो। प्रतियोगिताको उपाधि विजेताले दुई लाख ५५ हजार र उपविजेताले एक लाख २८ हजार रुपैयाँ पुरस्कार पाउने छन्। प्रतियोगितामा काठमाडौं, रौतहट, दाङ, कैलाली र कञ्चनपुरका गरी १६ टिमको सहभागिता छ।