सुनसरी- नडाहा हुँदै कान्छीचोक निस्किने चतरा सडककमा दौडिरहेको स्कुटरमा रुख ढालेर किच्दा स्कुटरमा पछाडि बसी यात्रा गर्ने मुनरलाल चौधरी मृत्यु भएको छ।
बराहक्षेत्र नगरपालिका वडा नम्बर २-३ सीमाअन्तर्गत हरिणे खोला पुलनजिक आज बिहान हावाहुरीसहित आएको पानीले ढलेको रुखले स्कुटरलाई किचेको हो। घटनामा स्कुटर पछाडि बसेका रामधुनी नगरपालिका– ६ बस्ने चौधरी गम्भीर घाइते भएका थिए।
उनलाई तत्कालै उद्धार गरी उपचारका लागि बीपी कोइराला स्वास्थ्य विज्ञान प्रतिष्ठान धरान पठाइएको नडाहा प्रहरी चौकीका इन्चार्ज असई कुमार श्रेष्ठले जानकारी दिए। चौधरीको उपचारको क्रममा निधन भएको थारू चलचित्र तथा सांस्कृतिक संघ सुनसरीका वरिष्ठ उपाध्यक्ष प्रदीप चौधरीले जानकारी दिए।
आगामी २५ असोजमा झुम्कामा हुन गइरहेको ‘साइराम मौगिया आशा वशज’ सम्मेलनका लागि भेटघाट तथा निमन्त्रणा पत्र बाँड्न आफ्नो घर रामधुनी–५ बाट चतरा हुँदै उदयपुरतिर जाने क्रममा नाति संगम चौधरीले चलाएको को२९प ५५०२ नम्बरको स्कुटरलाई रुखले थिचेको थियो। पछाडि बसेका ६१ बर्षका मुनरलाल चौधरी भवितव्य दुर्घटनामा परि धाइते भएका थिए।
६१ वर्षीय चौधरी थारू चलचित्र तथा सांस्कृतिक संघ केन्द्रीय अध्यक्ष तथा अभिनेता, निर्माता, निर्देशक, म्याजिक हल झुम्काका प्रोपाइटर प्रशुराम चौधरीका मृतक पिता हुन्।