काठमाडौं- आज २४ सेप्टेम्बर। विश्व इतिहासका विभिन्न घटनाले आजको दिन स्मरण गराउँछन्। प्रस्तुत छ, तीमध्ये केही प्रमुख घटनाको सारसंक्षेप।

– सन् १९७३- गिनी-बिसाउ स्वतन्त्र

सन् १९७३ मा आजकै दिन पश्चिम अफ्रिकाको एटलान्टिक तटीय मुलुक गिनी-बिसाउले पोर्चुगलबाट स्वतन्त्रता पाएको थियो। स्वतन्त्रताको मान्यता भने १० सेप्टेम्बर १९७४ मा मात्र प्राप्त गरेको थियो।

– सन् १९५७- सञ्चालनमा आयो विशाल स्टेडियम

९९ हजार दर्शक क्षमताको क्याम्प नोउ स्टेडियम आजकै दिन सञ्चालनमा आएको थियो। स्पेनको बार्सिलोनामा निर्मित यो स्टेडियम युरोपको सबैभन्दा ठूलो र संसारको ११औं ठूलो खेलमैदान हो।

– सन् १९४८- होन्डा कम्पनीको स्थापना

संसारकै ठूलोमध्येको मोटर उत्पादक होन्डा मोटरको स्थापना आजकै दिन भएको थियो। सोइचिरो होन्डाले यसको स्थापना गरेका थिए।

– सन् १८६९- अमेरिकामा ब्ल्याक फ्राइडे

जेम्स फिस्क र जे गोल्डको नेतृत्वमा सट्टेबाजहरूको समूहले सुन लुकाउन थालेका थिए। त्यसका कारण सुनको मूल्य ह्वात्तै आकाशिएको थियो। तर, राष्ट्रपति युलिसिस एस. ग्रान्टको आदेशपछि अमेरिकी राज्यकोषले ठूलो परिमाणमा सुन बजारमा निकालिदियो। र, केही मिनटपछि नै सुनको मूल्यमा फेरि भारी गिरावट आएको थियो।

– सन् १७८९- अमेरिकी कंग्रेसले ग्रहण गर्‍यो न्यायालयसम्बन्धी ऐन

आजकै दिन अमेरिकी संसद कंग्रेसले न्यायालयसम्बन्धी ऐन पारित गरेको थियो। सोही ऐनमार्फत सर्वोच्च अदालतलगायत न्यायिक अंगहरू पहिचानमा आएका थिए।